Qazaqstanda sońǵy eki aıda emhana tańdaý naýqany júrgizildi. 2020 jylǵy 9 qarashadaǵy málimetke sáıkes 74 myńnan astam adam emhanaǵa tirkelip úlgerdi, dep jazady Qamshy.kz aqparat agenttigi áleýmettik medısınalyq saqtandyrý qorynyń baspasóz qyzmetine silteme jasap.

Medısınalyq-sanıtarıalyq kómek uıymyna tirkelý TMKKK jáne MÁMS júıesi sheńberinde medısınalyq qyzmettiń barlyq spektrin alý úshin qajet. 

Emhanaǵa elektrondyq úkimet portaly arqyly tirkelýge bolady. Ol úshin "Densaýlyq saqtaý" bóliminde "Medısınalyq-sanıtarıalyq alǵashqy kómek kórsetetin medısınalyq uıymǵa tirkelý" qyzmetin tańdaý qajet. Ondaǵy suraqtarǵa jaýap bergennen keıin, ótinish avtomatty túrde emhanaǵa túsedi. Eger barlyǵy durys toltyrylsa, ótinish berýshige medısınalyq mekemeniń elektrondyq sıfrlyq qoltańbasymen rastalǵan tirkeý týraly habarlama keledi.

Sonymen qatar MSAK uıymynda bul qyzmet zeınetkerlerge, múgedekterge, patronat tárbıeshilerge, kolonıada jazasyn ótep jatqandarǵa, stýdentterge merzimdi qyzmettegi áskerı qyzmetkerlerge, shetelde dúnıege kelgen balalarǵa, sondaı-aq senimhat boıynsha tirkelýdi resimdeıtin adamdarǵa kórsetiledi. Ol úshin ótinish jazyp, jeke basyn kýálandyratyn qujatty kórsetý kerek.

Bekitý naýqany Densaýlyq saqtaý sýbektileriniń derekqorynda tirkelgen jáne TMKKK jáne MÁMS boıynsha Medısınalyq qyzmetter kórsetýge úmitker medısınalyq uıymdar arasynda ǵana júrgiziledi. Tolyǵyraq aqparatty Qor saıtynyń «Emhanany tańdaý» bóliminen bile alasyz.

Aıta ketý kerek, MSAK uıymyna tirkelgen azamattar 2021 jyldyń 1 qańtarynan bastap TMKKK sheńberinde jáne MÁMS júıesinde osy uıymda medısınalyq kómekti ala bastaıdy.