Qasym-Jomart Toqaev Asanáli Áshimovti "Atamannyń aqyry" fılminiń túsirilgenine 50 jyl tolýymen quttyqtady. Bul týraly akorda.kz habarlady. 

Qazaqstan Prezıdenti Qasym-Jomart Toqaev kıno jáne teatr óneriniń maıtalman akteri, Halyq ártisi, Qazaqstannyń Eńbek Eri Asanáli Áshimovti mıllıondaǵan kórermenniń yqylasyna bólengen "Atamannyń aqyry" kórkem fılminiń túsirilgenine 50 jyl tolýyna oraı quttyqtady.

– Ózińiz atalǵan kınotýyndyda chekıs Qasymhan Shadıarov rólin óte ǵajap somdap shyqtyńyz. Arpalysqa túsken qoǵamda jaýapty qyzmetkerdiń ózine júktelgen qupıa tapsyrmany oryndaý jolyndaǵy batyrlyq pen qaısarlyq tanytqan is-áreketin shynaıy kórsete bildińiz. Sizdi asa kórnekti akter retinde KSRO ǵana emes, búkil álemdik kınematografıa qaýymdastyǵy moıyndady. Sonymen qatar qazaqstandyq áıgili ártister Elýbaı Ómirzaqov, Nurmuhan Jantórın jáne Altynaı Eleýova da ózderi somdaǵan rólderin úlken sheberlikpen oryndaı bildi, – dep jazylǵan quttyqtaý hatta.

Memleket basshysy daryndy rejıser Sháken Aımanovtyń jáne úlken shyǵarmashylyq ujymnyń birlesken kúsh-jigeriniń arqasynda ómirge kelgen bul týyndynyń otandyq kıno óneri salasynda alatyn orny aıryqsha ekenin atap ótip, ony detektıv janrynda túsirilgen alǵashqy fılmniń biri dep baǵalady.

Prezıdenttiń quttyqtaý hatynda "Atamannyń aqyry" fılmi tarıhı derekterge negizdelgen shytyrman oqıǵalarǵa toly ekeni, sol zamannyń óskeleń urpaǵyn otansúıgishtikke, eldi qorǵaý úshin janqıarlyqpen kúresýge tárbıelegeni týraly aıtylǵan.

Sonymen qatar Memleket basshysy Halyq ártisine aldaǵy ýaqytta da otandyq kıno men teatr ónerin jáne halqymyzdyń rýhanı baılyǵyn damytý jolyna óz úlesin qosyp, eldiń aıryqsha qurmetine bólene berýine tilektestik bildirgen.