Premer-mınıstr Asqar Mamın prezıdent zeınetaqy men járdemaqylardy taǵaıyndaý jáne tóleýge qatysty prosesterdi tolyǵymen sıfrlandyrýdy tapsyrǵanyn atap ótti. Bul týraly ol úkimet otyrysynda málimdedi.

– Osy jyldyń sońyna deıin áleýmettik jáne eńbek salasynda elektrondyq formatta kórsetiletin memlekettik qyzmetter kórsetkishi 90 paıyzǵa jetkiziledi. Densaýlyq saqtaý mınıstrligine azamattarǵa qajetti elektrondyq medısınalyq málimetterdi berýdi qamtamasyz etýdi tapsyramyn. Eńbek mınıstrligi memlekettik organdarmen birlesip, zeınetaqy men járdemaqylardy taǵaıyndaý jáne tóleý prosesterin sıfrlandyrý úshin qajetti derekterdi tolyq sıfrlandyrý men jańartýdy qamtamasyz etýi kerek, – dedi Asqar Mamın.

Sondaı-aq úkimet basshysy 2021 jyly "qaǵaz" anyqtamalardy tolyǵymen joıý qajettigine toqtaldy.

– Smartfon qoldanýshylar sany ósýde, osy rette memlekettik qyzmetter men servısterdi mobıldik platformada kórsetý qajettiligi artyp otyr. Eń qajetti áleýmettik mańyzdy memlekettik qyzmetterdi mobıldik formatqa kóshirý jumysyn jandandyrý qajet. Sıfrlyq damý mınıstrligine múddeli memlekettik organdarmen birlesip, barlyq áleýmettik mańyzdy memlekettik qyzmetterdi eGov mobaılǵa aýystyrý boıynsha jospardy bekitýdi tapsyramyn. Jalpy 2021 jyly "qaǵaz" anyqtamalardyń qajettiligin tolyǵymen joıýymyz kerek. "Azamattarǵa arnalǵan úkimet" korporasıasynan qyzmetterdi jetkizýdi jáne barlyq onlaın qyzmetter men servısterdiń 100 paıyz qoljetimdiligin qamtamasyz etýimiz qajet, – dedi ol.