Bilim jáne ǵylym mınıstrligi ekinshi toqsannan bastap oqýshylardyń qalaı oqıtynyn málimdedi.

Mınıstrliktiń habarlaýynsha, Qazaqstanda 7 myńǵa jýyq mektep bar, olardyń 3700-den astamy karantındik shekteýler jaǵdaıynda dástúrli formatta jumys istep, barlyq synyp oqýshysyn mektep qabyrǵasynda oqytyp jatyr.

"Qalǵan mektepterde sanıtarlyq dárigerlerdiń talaby boıynsha oqytý aralas formatta júrgiziledi: ata-analardyń ótinishi boıynsha mektepaldy, bastaýysh jáne 5-synyp oqýshylary kezekshi synyptarda oqı alady. Biraq ár óńir boıynsha naqty sheshimdi jergilikti sanıtar dárigerler qabyldap, ruqsat beredi" delingen resmı saıt habarlamasynda.

Sonymen qatar bala kezekshi synypta oqıtyn bolsa, onda barlyq tapsyrma burynǵydaı qalypty formatta beriledi. Iaǵnı, bala synypta oqıdy, al úı tapsyrmasyn úıde oqýlyq boıynsha oryndaıdy.

Mınıstrlik qosymsha resýrs retinde qoljetimdi bilim berý platformalaryndaǵy kontentti qalaı paıdalaný kerektigin ár muǵalim ózi tańdaıtynyn jáne úı tapsyrmasynyń kólemi bekitilgen normadan tym kóp bolmaýy qajettigin habarlady.

Bilim mınıstrligi belgili bir platformany paıdalaný boıynsha talaptar qoımaıdy. Bilim berý platformasyn mektep ákimshiligi ózi tańdaıdy.