Janbolat Aǵadildiń óliminen keıin 3 adam qamaýǵa alyndy, qazir tergeý jumystary júrgizilýde. Bul týraly Nur-Sultan qalasynyń polısıa departamenti tergeý basqarmasynyń basshysy Gýmar Shynybekov habarlady.
– Qarashanyń 7 kúni saǵat 23:00 shamasynda Kóktal shaǵyn aýdanynda jáne Talapker aýylyndaǵy jigitter arasynda janjal bolǵan. Janjalǵa boıjetken sebepker. 23.00 shamasynda Aǵadilov dostarymen birge birneshe kólikpen Kóktalǵa barǵan. Olardy bir top jigit kútip turdy. Tóbeleske 5 adam qatysqan. Olardyń bireýi jeńil jaraqat aldy. Al Aǵadilovke pyshaq suǵyldy, júregine zaqym keldi, – deıdi tergeý basqarmasynyń basshysy.
Departamenttiń málimdeýinshe, J. Aǵadildiń ólimi boıynsha kúdiktilerden aıǵaq zattar alynyp, saraptama taǵaıyndalǵan.
– Úsh kúdikti, sonyń ishinde Aǵadilge pyshaq suqqan adamǵa qatysty qamaýǵa alý sanksıasy qoldanyldy. Aıǵaq zattar alyndy, saraptama taǵaıyndaldy, – deıdi G. Shynybekov.
Qazirgi ýaqytta atalǵan iske qatysty Qylmystyq kodekstiń 99-baby (adam óltirý) boıynsha tergeý jumystary júrip jatyr.
11 qarashada kúni Nur-Sultanda azamattyq belsendi Dýlat Aǵadildiń uly Janbolat Aǵadildi pyshaqtap óltirip ketkeni habarlandy.
Máıitti kórýge kirgen marqumnyń aǵasy Tańat Jalmaǵambetov Janbolattyń denesinen pyshaq jaraqatynyń izderin kórgenin aıtqan.
12 qarashada ishki ister mınıstrligi tergeý departamenti Janbolat Aǵadildiń ólimine qatysy bar delingen kúdiktiler ustalǵanyn málim etti.
Artynsha áleýmettik jelide Janbolat Aǵadilge "tóbeles kezinde abaısyzda pyshaq urdym" degen adamnyń vıdeosy taraǵan. Uzamaı vıdeodaǵy adam shynymen de kúdikti ekeni anyqtalǵan. Alaıda kúdiktiniń múgedek anasy "balasyna tanystary jala jaýyp otyr" dep sanaıtynyn aıtqan.
Keshe belgili zańger Abzal Quspan Facebook paraqshasynda "Janbolat Aǵadildiń ólimine qatysty: polısıa beınematerıaly zańsyz taratylǵan" degen ataýmen vıdeo jarıalady.
Pikir qaldyrý