Armenıa astanasy Erevannyń táýelsizdik alańynda taǵy mıtıń ótti. Narazy toptyń talaby ózgergen joq. Olar premer-mınıstr Nıkol Pashınánnyń otstavkaǵa ketkenin qalaıdy. Bul týraly ria.ru habarlady. 

– Pashınán ketýi kerek, óıtkeni onyń jeńil-jelpi basqaratyn bıligi kezinde biz jaǵdaıdy ózgerte almaımyz. Bizdiń el endi eńsesin tikteı almaıtyn boldy, – dedi opozısıalyq "Dashnaksýtún" partıasynyń ókili Gegam Manýkán.

Aksıaǵa sársenbide  "Zańmen belgilengen tártipti buzatyn jıyndardy ótkizý jáne uıymdastyrý" baby boıynsha  arnaıy tergeý qyzmetine shaqyrylǵan opozısıa jetekshileri qatysýda. Bul bap boıynsha eń joǵary úkim – eki aı kóleminde qamaýǵa alý.

Mıtıńke myńdaǵan adam keldi. Polısıa merzimdi túrde narazylyqty toqtatýǵa shaqyrdy, óıtkeni eldegi áskerı jaǵdaıǵa baılanysty mıtıńke tyıym salynǵan.

Buǵan deıin, Armenıa men Ázerbaıjan arasyndaǵy Taýly Qarabaq úshin bolǵan 44 kúndik soǵysta armán kúshteri 2,3 myńnan astam áskerinen aıyrylǵany habarlanǵan. 10 qarasha kúni Armenıa premer-mınıstri Nıkol Pashınán Ázerbaıjan prezıdenti Ilham Álıev jáne Reseı prezıdenti Vladımır Pýtın Taýly Qarabaqta áskerı áreketterdi toqtatý týraly kelisimge qol qoıǵan. Sol kelisim jasalǵan kúnnen bastap Armenıada narazylyqtar men qyzý pikirtalastar jalǵasyp keledi.