Bilim jáne ǵylym mınıstri Asqat Aımaǵambetov parlament senatynyń jalpy otyrysynda stýdentter kolejdi ózderi tańdaıtynyn, soǵan sáıkes granttar bólinetinin habarlady.

Depýtat Altynbek Nýhuly bilim jáne ǵylym mınıstrinen búdjet qarajaty tıimsiz jumsalmaý úshin qandaı sharalar jasalynyp jatqanyn surady.

– Táýekelderdiń (qarajat tıimsiz jumsalmaý úshin – red) aldyn alý úshin tıisti jumystardy júrgizýdemiz. Birinshi, kúni keshe májilis depýtattary otyrysta bilim týraly zańnamaǵa ózgerister engizý týraly zań jobasyn ekinshi oqylymda maquldady. Osy zań jobasynda táýekelderdi aldyn alý boıynsha naqty norma bekitildi. Bilim jáne ǵylym mınıstrligi osy memlekettik tapsyrysty ornalastyrý boıynsha qaǵıdany nemese metodıkany bekitý boıynsha jańa quzirettilik aldy. Endi osy zań bekitilgennen keıin "Atameken" palatasymen, eńbek mınıstrligimen qosa, basqa da áriptestermen birge osy ádisterdi bekitetin bolamyz, – dedi mınıstr.

Aımaǵambetov kolejge bólinetin grantta ózgerister bolatynyn aıtty.

– Ekinshi mańyzdy másele – kolejderdiń arasynda memlekettik tapsyrystardy ornalastyrý. Qazirgi ýaqytta jyl saıyn bilim basqarmalary konkýrs ótkizedi. Sonyń nátıjesinde ár kolejge neshe grant alatynyn bólip beredi. Bul tetik tolyǵymen ózgeredi. Endi basqa qaǵıda bolady. Bul qaǵıda – "Aqsha stýdentpen birge júredi" qaǵıdasy. Endi stýdentter kolejderdi ózderi tańdaıdy. Granttar sol kolejderge baratyn bolady. Bul básekelestikti arttyrady. Sapaǵa da áserin tıgizedi. Sol sebepti osy da, basqa da baǵyttar boıynsha jumys júrgizemiz, – dedi ol.