Elorda dámhanasyndaǵy jarylystan keıin úsh adam jansaqtaý bólimine tústi. Bul týraly qalalyq densaýlyq saqtaý basqarmasynyń baspasóz qyzmeti habarlady.

Baspasóz qyzmetiniń málimetinshe, olardyń biri asa aýyr jaǵdaıda jatsa, ekeýiniń aýyr jaǵdaıy aýyr dep baǵalanýda. Barlyǵy 23 adam № 1 jáne №2 kópsalaly aýrýhanalarǵa jatqyzyldy. Jeńil jaraqat alǵan 11 jábirlenýshi ambýlatorıalyq emdelýge jiberildi.

"Negizinen naýqastar túrli dárejedegi termıalyq kúıiktermen, ortasha deńgeıdegi ýly gazben ýlanýmen, jaraqattarmen aýrýhanaǵa jatqyzyldy. Bir naýqas jambas súıeginiń jabyq synýymen travmatologıa bóliminde jatyr. Qalǵandarynyń barlyǵy kombýstıologıa bóliminde. Olardyń jaǵdaıy ortasha aýyr, asqynýsyz" delingen vedomstvo taratqan habarlamada.

21 qarashada elorda dámhanalarynyń birinde joıqyn jarylys bolyp, bir adam qaza bolǵan.

Qazirgi ýaqytta atalǵan fakt boıynsha qylmystyq kodekstiń 292-baby 2-tarmaǵy boıynsha (Abaısyzda adam ólimine nemese ózge de aýyr zardaptarǵa ákep soqqan is-áreket) sotqa deıingi tergeý jumystary bastaldy.

Elorda ákimi Altaı Kólginov gaz balony jarylǵan dámhanadaǵy órtten qaza bolǵan qyzdyń otbasyna kóńil aıtyp, kómek kórsetiletinin málim etken.