Almatynyń bas sanıtar dárigeri Jandarbek Bekshın koronavırýs ınfeksıasyna baılanysty almatylyqtarǵa úndeý jasady.

Onyń aıtýynsha, bas sanıtar dárigerdiń qaýlysymen engizilgen qoldanystaǵy shekteý sharalary KVI aýrýynyń ósýin tejeıdi jáne jasyl aımaqta qalýǵa múmkindik beredi.

– 26 qarashadaǵy jaǵdaı boıynsha Almaty qalasynda epıdemıalyq jaǵdaı qıyn (aýyr) bolyp tur. Soǵan baılanysty qala aýmaǵynda engizilgen shekteý sharalary jalǵasýda. Jyl basynan beri aýmaqta koronavırýs ınfeksıasynyń 15 876 jaǵdaıy jáne 1140 etıologıasy anyqtalmaǵan pnevmonıa tirkeldi.

Qazirgi epıdemılogıalyq jaǵdaı boıynsha Almaly jáne Bostandyq aýdandary – sary beldeýde. Áýezov (21,2) jáne Medeý (23,3) aýdandary koronavırýs ınfeksıasynyń jıiligi boıynsha "qaýipti" aımaqta. Taralý ındeksi boıynsha eń turaqty jaǵdaı Jetisý (0,9) jáne Túrksib (1,0) aýdandarynda baıqalady.

Bizdi áli de birqatar kásiporyndardyń jaýapsyzdyǵy alańdatyp otyr, mysaly "Nebo" túngi klýby shekteý sharalaryn 3 ret buzdy. Nátıjesinde 950 myń teńgeniń aıyppuly salynyp, sotqa qyzmetin toqtatý týraly talap-aryz joldandy, buǵan qylmystyq jaýapkershilik artylady, – dedi Bekshın.

Sonymen qatar ol onlaın rejımde oqıtyn oqýshylar arasynda syrqattanýshylardyń ósý faktisi týraly aıtty.

– Onlaın oqýdaǵy oqýshylar arasynda syrqattanýshylyqtyń ósýi baıqalady, sol sebepti ata-analardan balalardyń densaýlyǵyn qorǵaýdy suraımyz. Balalar aýrýshańdyǵynyń negizgi sebebi – kompúterlik jáne basqa jabyq klýbtarǵa barý, sondaı-aq adamdar kóp jınalatyn oryndarǵa (túngi klýbtar, meıramhanalar jáne t. b.) baratyn basqa otbasy músheleriniń ınfeksıany juqtyryp ákelýi, sondaı-aq qashyqtan jumys isteýdi elemeý, – dep atap ótti ol.

Bas sanıtar dáriger koronavırýs ınfeksıasynyń aldynalý úshin qala turǵyndarynan profılaktıkalyq sharalardy qatań saqtaýǵa shaqyrdy.