Shyǵys Qazaqstan oblysy koronavırýstyń taralýy boıynsha "sary" aımaqqa kirdi. Bul týraly oblys ákimi Danıal Ahmetov óziniń Facebook paraqshasynda jazdy.
– Ortaq kúsh-jigerimizdiń jáne SHQO turǵyndarynyń joǵary jaýapkershiliginiń arqasynda biz COVID-19 ınfeksıasynyń taralý deńgeıin tómendete aldyq. Búginde aımaqta koronavırýstyń kóbeıý koefısıenti báseńdedi. Qarashanyń basymen salystyrǵanda reprodýktıvti R sany 1,85-ten 0,84-ke deıin, al tósek qorynyń qamtylý paıyzy 31,1-den 14,5-ke deıin tómendedi. Vırýs juqtyrǵandar sany 7 qarashada 353 adam bolsa, keshe 73 qurady, – deıdi ol.
Onyń aıtýynsha, SHQO koronavırýs ınfeksıasynyń taralýy boıynsha "qyzyl" aımaqtan shyǵaryldy.
– Biz koronavırýstyń "sary aımaǵyna" kirdik. Bul qoldanystaǵy shekteýlerge birqatar jeńildikter engizýge múmkindik beredi. Alaıda indetten ázirge vaksına joq, sondyqtan KVI-den eń senimdi qorǵanys – saqtyq sharalary men áleýmettik qashyqtyq bolyp qala bermek. Bizdiń qazirgi basty mindetimiz – syrqattyń ósýine jol bermeý, emdeý mekemeleriniń tıimdiligin arttyrý jáne halyqtyń densaýlyǵyn saqtaýdy qamtamasyz etý. Ózińiz ben jaqynyńyzǵa qorǵan bolyńyz, – dep jazdy Danıal Ahmetov.
Pikir qaldyrý