Májilis depýtaty Nurjan Áltaev "Nur Otan" partıasy qatarynan shyǵarylyp, depýtattyq ókilettigi toqtatyldy. Bul týraly ortalyq saılaý komısıasynyń resmı saıty habarlady.
"QR parlamenti májilisiniń depýtaty Nurjan Baýyrjanuly Áltaevtyń ókilettigi onyń "Nur Otan" partıasynyń qatarynan shyǵarylǵany týraly "Nur Otan" partıasy Nur-Sultan qalasy fılıalynyń saıası keńesi búrosynyń 2020 jylǵy 30 qarashadaǵy №1 qaýlysyna baılanysty toqtatylsyn" delingen resmı habarlamada.
Májilis depýtaty Pavel Kazansevtiń aıtýynsha, "Nur Otan" bedelin túsiretin ári onyń múddesine nuqsan keltiretin is-áreketter jasaǵany úshin N. Áltaevty partıa qatarynan shyǵarýdy "Nur Otan" partıasy Nur-Sultan qalasy fılıalynyń saıası keńesi búrosyna usyný sheshimi biraýyzdan qabyldandy.
– "Nur Otan" partıalyq baqylaý komıtetiniń otyrysy ótti. Onda partıa múshesi Nurjan Áltaevtyń partıa jarǵysy men partıa múshesiniń etıka kodeksin saqtaýy máselesi qaraldy, – dep jazdy májilis depýtaty óziniń áleýmettik jelidegi paraqshasynda.
Eske sala keteıik, Nurjan Áltaev byltyr 13 aqpanda parlament májilisiniń depýtaty bolǵan. Sol kezde ol parlamenttiń tómengi palatasynyń agrarlyq máseleler komıtetiniń quramyna kirgen.
