Birikken Ulttar Uıymynyń (BUU) ókili Qazaqstannyń terorızmge qarsy is-qımylyna joǵary baǵa berip otyr. Jýyrda Syrtqy ister mınıstri Muhtar Tileýberdı BUU Bas hatshysynyń orynbasary – Terorızmge qarsy is-qımyl dıreksıasynyń basshysy Vladımır Voronkovpen beınekonferensıa arqyly kelissózder júrgizdi.

Kezdesý barysynda taraptar terorızmge qarsy is-qımyl salasyndaǵy yntymaqtastyqty damytý josparlaryn, onyń ishinde Qazaqstannyń bastamasymen jasalǵan terorızmnen azat álemge jetý, sondaı-aq áskerı qaqtyǵystar aımaqtarynan oralǵan azamattardy, eń aldymen balalardy ońaltý jáne reıntegrasıalaý boıynsha aldyńǵy qatarly qazaqstandyq tájirıbeni nasıhattaýǵa baǵyttalǵan birlesken jobalardy júzege asyrý úshin ádep kodeksin ilgeriletýdi talqylaǵan bolatyn.

BUU ókili bizdiń elimizdiń halyqaralyq terorızmge qarsy is-qımyl salasyndaǵy qyzmetin jáne Sırıa men Iraktan azamattarymyzdyń oralýy boıynsha «Jýsan» jáne «Rýsafa» gýmanıtarlyq operasıalarynyń nátıjelerin joǵary baǵalady.

Qazaqstan BUU-nyń Ortalyq Azıadaǵy terorızmge qarsy jahandyq strategıasyn iske asyrý jáne BUU-nyń Almaty habynyń negizinde aımaqtyq yntymaqtastyqty nyǵaıtý jónindegi aımaqtyq is-sharalar josparynyń tórtinshi kezeńin ázirleýge jáne iske asyrýǵa belsendi qatysýǵa nıetti ekenin bildirdi.

Qazaqstan terorızmge qatysy bar degen kúdikpen óz azamattaryn Sırıa men Iraktaǵy qaqtyǵys aımaqtarynan birinshi bolyp qaıtarǵan elderdiń qatarynda. Azamattardyń kópshiligi áıelder men balalar, biraq oralǵandar arasynda terorıstik toptardyń músheleri, onyń ishinde kisi óltirýshiler men jazalaýshylar da bar. BUU Bas Assambleıanyń 75-shi sesıasy aıasynda ótkizilgen is-shara barysynda Qazaqstan da óz tájirıbesimen bólisti.

Erkejan Aryn