Fransıa ara-tura Taýly Qarabaq máselesi boıynsha Ankaraǵa habarlasýǵa tyrysty, biraq Ankara buǵan reaksıa bildirmedi. Sebebi ol Parıjdiń shynaıy maqsattaryn jaqsy biledi. Bul týraly Túrkıa prezıdenti Rejep Taıyp Erdoǵan ázerbaıjandyq áriptesi Ilham Alıevpen kelissózderden keıingi birlesken baspasóz máslıhatynda málimdedi.

Erdoǵan taǵy da Ázerbaıjan halqyn jáne prezıdent Álıevti Qarabah soǵysyndaǵy jeńisimen quttyqtady.

– Osy 44 kúndik soǵystaǵy jeńis tek baýyrlas Ázerbaıjan úshin ǵana emes, búkil Túrkıa úshin qýanysh. Túrkıa men onyń turǵyndary armán halqyna kek saqtamaıdy. Biraq barlyq másele Armenıa basshylyǵyna baılanysty. Eger Erevan Ankaraǵa oń qadamdar jasasa, biz shekarany ashamyz. Kórshiles elmen shekarany birjola jaýyp tastaǵymyz kelmeıdi, – dedi Túrkıa prezıdenti Rejep Taıyp Erdoǵan.

Ol búginde Túrkıada 100 myńnan astam armán azamaty jumys isteıtindigine nazar aýdardy.

Buǵan deıin Ázerbaıjan astanasy Bakýde Ázerbaıjan men Túrkıa prezıdentteri Ilham Alıev pen Rejep Taıyp Erdoǵan qatysqan jeńis sherýi ótti. Qalanyń ortalyǵyna jerin azat etý kezinde jaralanǵan ofıserler men áskerıler, ardagerlerdiń bári keldi. Jalpy sherýge 3000-nan astam adam qatysty. Bul kúnde 150-ge jýyq áskerı tehnıka, onyń ishinde jańadan qabyldanǵan zamanaýı áskerı tehnıkalar, zymyrandyq jáne artılerıalyq qondyrǵylar, áýe shabýylyna qarsy qorǵanys júıeleri, sondaı-aq áskerı kemeler men katerler kórsetildi.