Germanıalyq dw.com saıty Qazaqstanda 10 qańtar kúni bolatyn parlament májilisi saılaýyna úmitker retinde usynylǵan senattyń eks-tóraǵasy Darıǵa Nazarbaeva týraly, onyń saıasatqa kelýi Qazaqstan júıesine qalaı áser etýi múmkin ekeni jaıly jazdy.

Batys basylymy ózin opozısıa retinde kórsetetin JSDP partıasy saılaýǵa baıkot jarıalaǵannan keıin saıası oqıǵa tartymdylyǵyn joǵaltqanyn, alaıda Darıǵa Nazarbaevanyń kandıdattar tizimine enýi qyzyqty saıası sújetke jol ashqanyn jazdy.

"Novaıa gazeta Kazahstan" gazetiniń bas redaktory Aleksandr Krasner budan prezıdent Toqaev pen eks-prezıdenttiń qyzy Darıǵa Nazarbaeva arasyndaǵy qaıshylyqty kórgen.

– Eger ol (Darıǵa Nazarbaeva - red.) parlamentke kelse, prezıdent ekinshi ret ony ol jaqtan shyǵara almaıdy, – dep sanaıdy Aleksandr Krasner.

Onyń aıtýynsha, Q.Toqaev pen D.Nazarbaeva arasyndaǵy konflıkt kezdeısoq jaǵdaı emes, bul – ekinshi prezıdent pen bılikti ýysynan shyǵaryp alǵysy kelmeıtin "Nazarbaev áýletiniń" ókili arasyndaǵy saıası teketiresti bildiredi.

Jýrnalıs Nazarbaevanyń parlamentke oralýy onyń jeke esep aırysýynan bólek, áýlettiń bılikti tolyqtaı óz qoldaryna qaıtarýyn bildiretinin atap ótti.

Sondaı-aq Aleksandr Krasner Nazarbaeva májiliste qatardaǵy depýtat bolýdy mise tutpaı, vıse-spıker ıaǵnı eldegi úshinshi adam bolýǵa yntalanýy múmkin ekenin aıtty.

Sarapshy Nursultan Nazarbaev parlamenttik respýblıka qurýǵa yntaly ekenin, prezıdenttiń keıbir ókilettigin parlamentke berý týraly erejeler ázirlengenin, 2019 jyly 3 qalada parlamenttik respýblıkany jaqtaýshylar 1995 jylǵa deıingideı prezıdent parlamentke esep berýdi talap etip ruhsat etilmegen mıtıń ótkizip, olardy eshkim qýmaǵanyna nazar aýdardy.

– Qazir sol (parlamenttik respýblıka) júzege asatyn sát kele jatyr ári bul Darıǵa Nazarbaevanyń josparymen úılesedi. Eger ol parlamentte joǵary laýazymǵa qol jetkizse, prezıdent ary da, beri de júgiretin bolady. Bul onyń revanshy jáne "áýlet" pozısıasyn qaıtarý bolmaq, – dedi jýrnalıs.

Alaıda basylymda pikiri jarıalanǵan saıasatker Ámirjan Qosanov Darıǵa Nazarbaeva qarjylyq, medıalyq jáne basqa da resýrstarynyń baryna qaramastan, joǵary bılikke talasqa túse almaıdy dep  sanaıdy.

– Bılik basyndaǵy ortalar men úlken bızneste Nazarbaev qyzynyń saıası ambısıalaryn qoldaı ketetinder kóp deýge kelmeıdi. Onyń (Nazarbaeva - red.) saıası jáne iskerlik elıta arasynda jaýy kóp, –  dedi Qosanov.