Almaty taýlarynan tabylǵan er adam Erman Baımenov qaıtys boldy, dep habarlady tótenshe jaǵdaılar mınıstrliginiń baspasóz qyzmeti.

Vedomstvo málimetinshe, qutqarýshylar Erman Baımenovty taýdan taýyp, jedel járdemge tabystaǵansha bes saǵat ýaqyt ketken. Zardap shekken adamnyń jaǵdaıy tabylǵan kezde óte aýyr bolǵan.

– Saǵat 20:45-te respýblıkalyq jedel-qutqarý jasaǵynyń qutqarýshylary zardap shekken 1985 jyly týǵan er adamdy Kúmbelsý ózeniniń kópirinde kútip turǵan jedel medısınalyq kómek brıgadasy men Apattar medısınasy ortalyǵynyń qyzmetkerlerine tapsyrdy. Ekinshi izdeý-qutqarý tobynda bolǵan Apattar medısınasy ortalyǵynyń dárigeri er adamnyń qaıtys bolǵanyn anyqtady, – dedi tótenshe jaǵdaılar mınıstrliginiń resmı ókili Talǵat Ýálı.

Buǵan deıin tótenshe jaǵdaılar mınıstrliginiń baspasóz qyzmeti 12 jeltoqsan kúni Tıtov kóliniń mańynda er adamnyń joǵalyp ketkeni týraly habarlady. Eki táýlik izdeýden keıin 14 jeltoqsanda saǵat 15:50-de er adam Qumbelsý ózeniniń shatqalynan tabyldy. Tabylǵan ýaqytta er adamnyń jaǵdaıy óte aýyr bolǵan. Táýliktiń qarańǵy mezigili men taý betkeıiniń qaýipti tik bolýyna baılanysty ony tasymaldaý jumysy qıyndaǵan. Er adamdy qutqarý operasıasyna respýblıkalyq jedel-qutqarý jasaǵynyń 26 qutqarýshysy jumyldyryldy. Qutqarý jumystary birneshe saǵatqa sozylǵan.