Qazaqstannyń eks-prezıdenti Nursultan Nazarbaev qazaqstandyqtardy 16 jeltoqsan Táýelsizdik kúnimen quttyqtady, dep habarlady Elbasynyń resmı saıty.

"Qurmetti otandastar! Barshańyzdy elimizdiń eń ulyq merekesi – Táýelsizdik kúnimen shyn júrekten quttyqtaımyn! Biz 29 jyl buryn ata-babamyzdyń ǵasyrlar boıy ańsaǵan armanyn oryndap, táýelsizdikke qol jetkizdik. Álem qartasyna Qazaqstan atyn oıyp jazdyq.

Sol sátten elimizdiń jańa tarıhy bastaldy. Osy jyldar ishinde memleketimiz aıtarlyqtaı ósip-órkendedi, aıtýly jetistikterge  jetti. Biz eldigimiz ben egemendigigimizdi nyǵaıtyp, shekaramyzdy bekittik. Básekege qabiletti naryqtyq ekonomıkaǵa kóship, memleketimizdi aıaqqa nyq turǵyzdyq.

Qazaqstan álem moıyndaǵan irgeli elge aınaldy. Eýrazıa júreginde jańa astanamyzdy saldyq. Biz elimizde turaqtylyqty, qoǵamymyzda tatýlyq pen kelisimdi saqtaı otyryp, kóp ultty halqymyzdy bási bólek artyqshylyqqa aınaldyrdyq.

Táýelsizdikti alyp, ony dúnıege pash etý bir bólek, al sol táýelsizdikti saqtap qalý odan da zor mindet. Biz osy jyldar ishinde burynǵy Keńes odaǵy qulaǵan tusta dúnıedegi eń úlken ekonomıkalyq daǵdarysty artqa tastap, qazirgi jahandyq pandemıany da eńserip otyrmyz.

Basymyzǵa túsken synaqtar bizdi shyńdap, rýhymyzdy kúsheıtip, jigerimizdi arttyrdy, ortaq maqsatqa jumylýymyzǵa túrtki boldy.

Qazaqstannyń damý men órkendeý jolynda únemi alǵa basýy úshin qoldan kelgenniń bárin jasap, berik negiz qalyptastyrdyq. Táýelsizdikpen birge san ǵasyrlyq tarıhymyz, tól mádenıetimiz ben ata dástúrimiz qaıta túledi. Biz Altaıdan Atyraýǵa, Alataýdan Arqaǵa deıingi ulan-ǵaıyr atyrapty mekendegen bahadúr babalardyń urpaǵymyz. Ústirt pen Qart Kaspııdiń jaǵasyn, Syr men Ertistiń arasyn alyp jatqan baıtaq dalanyń zańdy muragerimiz. Bul – ata-babamyzdyń amanaty.

Osyny eshqashan umytpaýymyz kerek. Babadan mıras bolǵan qasterli jerimizdi kózdiń qarashyǵyndaı saqtaý, táýelsizdigimizdi baıandy etý, elimizdiń jarqyn bolashaǵy úshin qyzmet etý – bárimizdiń asyl boryshymyz" delingen Nazarbaev úndeýinde.