Prezıdent Qasym-Jomart Toqaev premer-mınıstr Asqar Mamındi qabyldady. Premer-mınıstr memleket basshysyna eldegi sanıtarlyq-epıdemıologıalyq ahýal men áleýmettik-ekonomıkalyq damýdyń ózekti máseleleri jaıynda esep berdi.

Úkimet basshysy respýblıkadaǵy sanıtarlyq-epıdemıologıalyq ahýal baqylaýda ekenin, kúndelikti jańadan indetke shaldyqqandardyń sany 0,4 paıyzǵa ósip otyrǵanyn, el boıynsha koronavırýstyń órshý deńgeıiniń kórsetkishi 0,9 paıyzdy quraıtynyn aıtty.

Onyń aıtýynsha, juqpaly aýrýlar aýrýhanalarynyń 28 paıyzynda, jansaqtaý bólimderiniń 20 paıyzynda adamdar emdelip jatyr.

Qazirgi ýaqytta COVID-19 indetiniń taralý qarqyny boıynsha Atyraý oblysy "qyzyl" aımaqta, Qostanaı, Aqmola, Pavlodar jáne Soltústik Qazaqstan oblystary "sary" aımaqta, qalǵan óńirlerdiń barlyǵy "jasyl" aımaqta tur.

Mamın 19 jeltoqsanda otandyq QazCovid-in vaksınasyn klınıkalyq synaqtan ótkizýdiń sońǵy İİİ satysy bastalatynyn eskertti. Ol 3 myń erikti azamatqa ekpe egilýde ekenin aıtty.

– 2021 jyly naýryz aıynda Jambyl oblysy Qordaı aýdanynda jylyna qýaty 60 mıllıon mólsherde vaksına shyǵarýǵa jetetin bıofarmasevtıkalyq zaýyt paıdalanýǵa beriledi. Sonymen birge Qaraǵandy qalasynda reseılik "Spýtnık V" vaksınasyn shyǵarý óndirisin iske qosýǵa daıyndyq jumystary júrip jatyr, – dep atap ótti úkimet basshysy.