Qazaqstanda 2020 jyldyń 25 jeltoqsannan bastap 2021 jyldyń 5 qańtaryna deıin shekteý sharalary kúsheıtiledi. Bul týraly premer-mınıstrdiń resmı saıty habarlady.
"Qazaqstanda koronavırýs ınfeksıasynyń taralýy baqylanatyn deńgeıde tur. Koronavırýs ınfeksıasymen jańadan syrqattanǵandardyń táýliktik ósimi 0,4%-dy, reprodýktıvtik kórsetkishi 0,9-dy quraıdy. Infeksıalyq tósek oryndarynyń tolymdylyǵy – 28%, reanımasıalyq tósek oryndarynyń tolymdylyǵy – 20%. 5 óńir joǵary jáne ortasha táýekel aımaqtarynda ornalasqan, atap aıtsaq: Atyraý, Qostanaı, Pavlodar, Soltústik Qazaqstan jáne Aqmola oblystary" delingen habarlamada.
Kelesi jylǵy qańtar-aqpan aılarynda JRVI men tumaýdyń ósýi aıasynda koronavırýs ınfeksıasymen syrqattaný deńgeıiniń artý qaýpi bar.
Osyǵan baılanysty VAK birqatar sheshim qabyldady:
- 2020 jylǵy 25 jeltoqsannan bastap 2021 jylǵy 5 qańtarǵa deıin oıyn-saýyq, sporttyq jáne basqa da buqaralyq is-sharalardy, onyń ishinde jańa jyldyq erteńgilikter men merekelik korporatıvterdi ótkizýge tyıym salynady.
- Epıdemıologıalyq jaǵdaı turaqtalǵanǵa deıin "Teńiz" ken ornynda shekteý sharalary kúsheıtiledi.
- Bólshek saýda jelisinde antıkovıdti dárilik zattardyń baǵasyn orta eseppen 24%-ǵa tómendetý boıynsha sharalar qabyldaý.
Sonymen qatar bilim berý sapasyn qamtamasyz etý maqsatynda, Bilim jáne ǵylym mınıstrliginiń usynysy boıynsha, sondaı-aq qoǵamnyń pikirin eskere otyryp, kelesi sheshimder qabyldandy:
- oqý jylynyń III toqsanynan bastap bitirýshi synyptar úshin (9,11,12 synyptar) sanıtarlyq-epıdemıologıalyq talaptardy saqtaı otyryp, aralas oqytý (pánderdiń 70%-yn – dástúrli formatta, 30%-yn – qashyqtan) qarastyrylsyn;
- oqý jylynyń III toqsanynan bastap mektep oqýshylarynyń bilimindegi olqylyqtardyń ornyn toltyrý maqsatynda sabaqtan tys ýaqytta 5 adamnan aspaıtyn toptarda jeke konsýltasıa uıymdastyrylsyn;
- II semestrden bastap kolejder men joǵary oqý oryndarynyń birinshi kýrs stýdentterin aralas oqytý qaıta bastalsyn.
Úkimet basshysy ákimderge óńirdegi epıdemıologıalyq jaǵdaıǵa baılanysty jaǵdaıdy turaqtandyrý maqsatynda qajetti shekteý sharalaryn qabyldaýdy tapsyrdy.
