TMD halyqaralyq baıqaýshylary elordanyń birneshe saılaý ýchaskesiniń daıyndyǵyn pysyqtady. TMD-daǵy mısıa shtabynyń jetekshisi Evgenııı Kozáktiń aıtýynsha, olar óz mısıasyna 21 jeltoqsanda kirisken.

– Osy kúnnen beri Qazaqstandamyz. Shtabymyz Nur-Sultan qalasynda ornalasqan. Alaıda biz tek elordanyń saılaý ýchaskeleriniń jumysyn ǵana emes, óńirlerdiń de daıyndyǵyn pysyqtaıtyn bolamyz. Men ózim Almaty qalasy men Almaty oblysyna baryp, saılaýǵa daıyndyq prosesin kórip qaıttym, – deıdi ol.

Búgin baıqaýshylar elordadaǵy eki saılaý ýchaskesiniń jumysymen tanysty. Eki ýchaske de daýys berýshilerdi qabyldaýǵa daıyn ekeni anyqtaldy.  

– Daýys berýge qajetti qural-jabdyqtardyń barlyǵy ornalastyrylǵanyna kýá boldyq. Saılaýshylarǵa qajetti jaǵdaı jasalǵan. Baıqaǵanymyzdaı, eń basty nazar sanıtarlyq sharalarǵa aýdarylypty. Daýys berýge arnalǵan kabınalar perdesiz etip jasalǵan. Ol dezınfeksıa jasaýǵa qolaıly. Degenmen ol daýys berýdiń qupıalylyǵyna kedergi keltirmeıdi dep oılaımyz. Óıtkeni daýys berýshi búletendi toltyrǵanda ózgelerge arqasymen turady. Qazir adamdardyń densaýlyǵy mańyzdy, – deıdi Evgenıı Kozák. 

Onyń aıtýynsha, mundaı ádis ózge TMD elderinde de qoldanylǵan. Mysaly Moldavada bolǵan saılaýda da kabına osylaı jabdyqtalǵan. 

– Jumys bastalǵaly barlyq saıası partıanyń saılaýaldy shtabynyń ókilderimen kezdestik. Olardan naýqandy uıymdastyrý barysy týraly oılary men usynystaryn tyńdadyq. Ázirge shaǵymdar estimedik. Sondaı-aq Ortalyq saılaý komısıasynyń múshelerimen de kezdestik. Eldiń aımaqtaryn da aralap júrmiz. Osylaısha daıyndyq týraly tolyqqandy áser alýǵa tyrysýdamyz, – dedi ol. 

Onyń aıtýynsha, dıplomatıalyq korpýs ókilderi, Qazaqstandaǵy TMD elshilikterinen baıqaýshy retinde 20 adam uzaq merzimdi baıqaýshy retinde tartylǵan. Saılaý kúnine jaqyn qysqa merzimdi baıqaýshylardyń toby keledi. Qazirgi kúni olardyń 200-den astamy Ortalyq saılaý komısıasynda akredıtasıadan ótti. 

– Saılaý aıaqtalǵan soń biz baıqaýshylardan aqparat alamyz, sonyń negizinde qorytyndy joba jasalady. Ol mısıamyzdyń baspasóz konferensıasynda 11 qańtar kúni jarıa bolady. Biz osymen 14 ret osy elde óz mısıamyzdy oryndap otyrmyz, tájirıbege súıenip aıtar bolsam, elde bul saıası naýqan zańnamaǵa saı ótip keldi, – dedi ol.

Derekkóz: Baq.kz