Karateden Qazaqstan ulttyq quramasynyń bas bapkeri Jastalap Sanaýov qaıtys boldy. Bul týraly prezıdent keńesshisi Erlan Qarın facebook paraqshasynda habarlady.

– Jastalap Sanaýov qazaqstandyq karate qozǵalysynyń negizin qalaýshylardyń biri boldy. Ol kóp jyldar boıy Qazaqstan karate-do federasıasyn basqardy. Álemge áıgili "Jk Fan" karate jýrnalynyń qazaqstandyq nusqasyn shyǵardy. Onyń arqasynda Qazaqstanda bedeldi halyqaralyq týrnırler ótkizildi. Ol halyqaralyq karate qaýymdastyǵynda qurmetke ıe boldy. Ol Dúnıejúzilik karate-do federasıasy Atqarý komıtetiniń quramyna saılanǵan TMD elderiniń birinshi jáne jalǵyz ókili boldy, – dep jazdy ol.

Onyń aıtýynsha, marqum Sanaýov Tokıodaǵy olımpıada oıyndarynda qazaqstandyq karateshi olımpıada altynyn jeńip alýdy armandaǵan.

Jastalap Sanaýov 1966 jyly 26 mamyrda Almatyda dúnıege kelgen. Halyqaralyq sport sheberi, Qazaqstannyń eńbek sińirgen jattyqtyrýshysy.

1986 jyly jattyqtyrýshylyqpen aınalysty, kóptegen halyqaralyq sport sheberlerin jáne álem chempıondaryn daıyndady.