Teslanyń zymyran jyldamdyǵyndaı qymbattaǵan aksıalarynyń baǵasy 2020 jyly "Teslanaires" dep atalatyn mıllıonerler armıasyn qalyptastyrdy.

Ilon Masktyń elektromobılder shyǵaratyn fırmasynyń aksıalary 2020 jyly 700%-ǵa ósti jáne álemdegi eń qymbat avtomobıl kompanıasyna aınaldy.

2020 jyl AQSH S&P 500 quramyna kirgen avtomobıl kompanıasy úshin mańyzdy kezeń boldy. S&P 500 – Qurama Shtattardaǵy eń iri aksıalar ındeksi. Oǵan Apple, Microsoft jáne Facebook sıaqty kompanıalar kiredi. Tesla aksıalary joǵary jyldamdyqpen ósip, ındeks boıynsha eń qundy 10 kompanıanyń qataryna endi.

Tesla aksıasy qazirgi ýaqytta General Motors, Ford, Fiat Chrysler Automobiles jáne Toyota kompanıalarynyń jalpy qunynan da joǵary. 

2010 jyldyń maýsymynda Teslanyń  ár aksıasy 17 dollar baǵamen bırjaǵa shyqqan. Osy aptada baǵa 650 dollardan asyp tústi.

Qazirgi kezde Teslaǵa qatty senetin jáne Ilon Mask avtomobıl fırmasynyń jarqyn bolashaǵyna negizdelgen aksıalar baǵasynyń ósýin boljaıtyn jankúıerler armıasy bar.

Los-Andjelestegi ınjener Djeıson DeBolttyń Teslaǵa salǵan alǵashqy ınvestısıasy 2500 aksıa, al, onyń quny 19000 dollar bolǵan.

"Men alǵash ret Teslaǵa ınvestısıa salýdy 2013 jyly Model S kóligin satyp alǵannan keıin bastadym" dedi ol. Sodan beri ol kóbirek aksıalar satyp alǵan, al qazir onyń ıeliginde turǵan aksıalardyń quny shamamen 10 mln dollar.

Nú-Iorktegi Skott Tısdeıl 2013 jyly Model S-ge alǵash kózi túskende Teslaǵa ınvestısıa sala bastady jáne shamamen 4000 aksıany ıemdenip úlgerdi, al, olardyń quny qazirgi ýaqytta shamamen 2.8 mln dollar.