«Nur Otan» óńirlerde halyqpen kezdesýdi jalǵastyrýda. Búgin partıa saılaýaldy shtabynyń músheleri Soltústik Qazaqstan oblysynda boldy.

Osyndaǵy Chapaevo aýylynda ornalasqan «Qyzyljar sút» bazasynda óńirdiń iri aýyl sharýashylyq kásiporyndarynyń basshylarymen birge partıanyń saılaýaldy baǵdarlamasy aıasynda salany damytý máselelerin qarastyrdy.

«Búginde azamattarymyzdyń 40%-ten astamy aýylda turady. Elbasy, partıa Lıderi Nursultan Nazarbaevtyń bastamasymen qolǵa alynǵan «Aýyl – El besigi» jobasy aıasynda biz aýyldyń áleýetin barynsha iske asyrýǵa, aýyl turǵyndarynyń ómir súrý sapasyn jaqsartýǵa odan ári jaǵdaı jasaıtyn bolamyz. Taıaýdaǵy 5 jylda «Nur Otan» jańa ınvestısıalyq jobalar men fermerlik sharýashylyqtar qurý esebinen aýyl sharýashylyǵynda 500 myńdaı adamdy jumyspen qamtamasyz etý mindetin qoıyp otyr. Aýylda kooperasıany yntalandyrý, aýyl sharýashylyǵy ónimderin forvardtyq satyp alýdy keńeıtý, zamanaýı sıfrlyq tehnologıalardy endirý boıynsha sharalar qabyldanady», - dep atap ótti saılaýaldy shtab jetekshisi Baýyrjan Baıbek.

Halyqaralyq talaptarǵa sáıkes veterınarlyq, fıtosanıtarlyq jáne karantın qyzmetterin jańǵyrtý jalǵasady. Sondaı-aq, aýyl sharýashylyǵyn ǵylymı ázirlemelermen qamtamasyz etý boıynsha agrarlyq ǵylym úshin naqty nysanaly ındıkatorlar daıyndalady.

Eldi otandyq óndiristiń negizgi azyq-túlik taýarlarymen qamtamasyz etý úshin 2025 jylǵa qaraı jalpy aýyl sharýashylyǵy óniminiń kólemin 1,3 ese, eńbek ónimdiligin – 2,5 ese, óńdelgen ónimniń úlesin 70%-ke jetkize otyryp, eksportty – 2 ese arttyrý josparlanýda.

Osy kúni Beskól aýylynda partıa músheleri «Eńbek» memlekettik baǵdarlamasy aıasynda óńirge qonys aýdarǵan otbasylarmen kezdesip, olarmen birge Soltústik Qazaqstan oblysynyń aldaǵy damý josparyn talqylady.

Atap aıtqanda, óńirde 65 myń jańa jumys ornyn ashý, myń shaqyrymnan astam avtojol salý jáne jóndeý, 142 aýyldyń 115 myń turǵynyn sapaly aýyz sýmen qamtamasyz etý, sondaı-aq áleýmettik muqtaj azamattarǵa arnap 2,5 myń páter salyp, jalpy 1,6 mln-nan astam sharshy metr turǵyn úıdi paıdalanýǵa berý josparlanyp jatyr.

«Memleket basshysy Qasym-Jomart Toqaev «Táýelsizdik bárinen qymbat» atty maqalasynda atap kórsetkendeı, azamattardyń el ishinde eńbek kóshi-qonyna, ásirese shekaralas eldi mekenderde qolaıly jaǵdaı jasaý qajet. Saılaýaldy baǵdarlamamyzdyń aıasynda biz eńbek kúshi kóp óńirlerden oǵan tapshylyq bar aımaqtarǵa kóshýshi otbasylarǵa qoldaý kórsetemiz. Bul rette «Dıplommen – aýylǵa» baǵdarlamasy boıynsha keletin jas mamandarǵa turǵyn úı alýǵa jeńildetilgen nesıe bólinedi. Sonymen qatar óńirler deńgeıinde jas otbasylardyń turǵyn úı máselesin sheshý boıynsha baǵdarlama ázirlenedi. Elimiz boıynsha jyl saıyn 700 myńdaı adam jumyspen qamtýdyń belsendi formalarymen qamtylady», - dep tolyqtyrdy bıleýshi partıa Tóraǵasynyń birinshi orynbasary.

Budan keıin Petropavl qalasynda saılaýaldy shtab ókilderi birneshe kezdesý ótkizdi. Onyń ishinde erekshe qajettiligi bar balalardy tárbıelep otyrǵan analarmen júzdesti.

«Barsha balaǵa – teń múmkindik» qaǵıdatyn iske asyra otyryp, «Nur Otan» partıasy barlyq kolej ben joǵary oqý oryndarynda, sondaı-aq 70% mektep pen mektepke deıingi uıymdarda ınklúzıvti bilim berýdi engizýdi qamtamasyz etedi. Ońaltý ortalyqtarynyń sany artyp, erekshe qajettiligi bar balalarǵa psıhologıalyq-pedagogıkalyq jáne korreksıalyq qoldaý boıynsha memlekettik tapsyrys engiziledi. Asyraýshysynan aırylǵan balalar bir mezgilde múgedektigi jáne asyraýshysynan aırylýy boıynsha 2 járdemaqy ala alady. Sondaı-aq, erekshe qajettiligi bar balalar úshin kámelettik jasqa tolǵannan keıin de turǵyn úıge kezeginiń úzilmeýi qamtamasyz etiledi.

Jalpy, «Kedergisiz keleshek» jobasy aıasynda aldaǵy 5 jylda erekshe qajettiligi bar adamdar úshin 22 myń áleýmettik ınfraqurylym nysanyn beıimdeý jalǵasyn tabady. Jumysqa ornalastyrý boıynsha kvotany oryndamaıtyn jumys berýshiler úshin ótemaqy tólemi engizilip, ol qarajat erekshe qajettiligi bar adamdar úshin jumys oryndaryn ashýǵa baǵyttalady.

«Nur Otan» partıasynyń saılaý qory qarajaty esebinen tólendi