Amerıkadaǵy áleýmettik daǵdarystar kezinde iri tehnologıalyq mıllıarderler kóbine alǵashqylardyń biri bolyp pikir bildiredi.
Tesla jáne SpaceX kompanıasynyń bas dırektory Ilon Mask kóptegen qurdastarynan aıyrmashylyǵy Vashıngtonda sársenbi kúni tústen keıin bastalǵan búlik týraly tikeleı aıtqan joq.
Biraq ǵalamshardaǵy eń baı adam jańalyqtardy kórip otyrǵanyn jáne AQSH Kapıtolııinde oryn alǵan zorlyq-zombylyq oqıǵalary týraly óz pikirin astarlap jetkizdi.
Ilon Mask Twitter paraqshasynda AQSH Kapıtolııinde bolǵan zorlyq-zombylyq úshin Facebook quryltaıshysy Mark Sýkerberg kináli ekenin meńzedi.
"Muny domıno effekt dep ataıdy" dep jazdy teh-mıllıarder. Mask Twitter paraqshasyna shyǵarǵan memde domıno tárizdi taqtaıshalar beınelengen.
Mask eń kishkentaı taqtaıshany "kampýstaǵy áıelderdi baǵalaýǵa arnalǵan veb-saıt" dep belgiledi. Bul Facebook-tiń alǵashqy nusqasyn meńzeıdi. Sebebi, Mark Sýkerbeg 2003 jyly kampýstaǵy qyzdardyń kelbetin baǵalaýǵa múmkindik beretin FaceMash-ty jasaǵan. Ol Facebook-tyń alǵashqy nusqasy boldy.
Masktyń tvıtine Nú-Iork Taımstyń tilshisi Mark Leıbovıch "Kapıtolıı vıkıng shlápasyn kıgen adamnyń baqylaýynda sıaqty" dep jazdy.
"Masktyń messedjy aıqyn boldy. Sársenbidegi dúrbeleńge sebep: áleýmettik jeli platformalary, ásirese Facebook jyldar boıǵy saıası jáne ıdeologıalyq polárızasıany qalyptastyrdy. Al bul sońynda domıno effektti týǵyzdy" dep túsindirdi Business Insider.
