Almatyda esirtki kontrabandasymen kúrestiń álemdik tarıhyndaǵy kólemi jaǵynan ekinshi geroın partıasy joıyldy. Bul týraly Qarjy monıtorıńi komıteti habarlady.

Almaty qalasy boıynsha Ekonomıkalyq tergeý departamentiniń qyzmetkerleri Jetisý kólik prokýratýrasynyń úılestirýi jáne arnaıy komısıanyń qatysýymen jalpy salmaǵy 1,1 tonnadan asatyn geroınniń asa iri partıasyn joıǵan.

"Esirtkini komıtet qyzmetkerleri Germanıanyń qylmystyq keden polısıasymen birlesip, sondaı-aq Reseı, Belarýs, Lıtva, Polsha jáne Nıderlandy quqyq qorǵaý jáne keden qyzmetteriniń kómegimen ótkizgen halyqaralyq arnaıy operasıa nátıjesinde tárkilegen.

Osylaısha, 2019 jyldyń qazan aıynda Qazaqstan aýmaǵyna "óńdelgen mármár" degen ataýmen júk ákelindi. Nıderlandyǵa jóneltilgen taýardy tekserý kezinde tergeýshiler geroın bar 2208 brıketti anyqtady. Uıymdasqan qylmystyq top esirtki tranzıtin Irannan Eýropalyq Odaq elderine ótkizýdi josparlaǵan.

Atalaǵan esirtkiniń bir bóligi, Qarjy monıtorıń qyzmetkerleriniń baqylaýymen Germanıaǵa jetkizildi, munda taýardy alý kezinde, Túrkıa eliniń azamattary ustalǵan bolatyn.

Qazirgi ýaqytta atalǵan is boıynsha qylmystyq kodekstiń 286-baby 4-bóligi boıynsha sáıkes sotqa deıingi tergeý amaldary júrgizilýde (esirtki, psıhotroptyq zattarmen, sol tektestermen baılanysty aınalystan alyp qoıylǵan zattardyń nemese aınalysy shektelgen zattardyń asa iri mólsherde jasalǵan kontrabandasy).