Almatyda jarylǵysh zat (granat) tabylyp, polısıa aınalasynda ornalasqan jeke sektordaǵy úılerdi qorshaýǵa aldy. Keıinirek tabylǵan granat jaýyngerlik emes bolyp shyqty. Bul týraly Tengrinews.kz saıty habarlady.

Oqıǵa eki kún buryn bolǵan. Internette oqıǵa ornyndaǵy vıdeo jarıalandy. Kadrlardan oqıǵa ornynda polısıa jumys istep jatqany kórinedi. 

Almaty polısıa departamentiniń habarlaýynsha, oqıǵa Naýryzbaı aýdanynda bolǵan.

– Tabylǵan granat jaýyngerlik emes. Onyń naqty shyǵý tegi men sáıkestigi arnaıy saraptama nátıjeleri boıynsha anyqtalady. Bul fakt sotqa deıingi tekserýdiń biryńǵaı tiziminde 287-baptyń 3-bóligi boıynsha "Qarýdy, oq-dárilerdi, jarylǵysh zattardy zańsyz alý, berý, satý, saqtaý, tasymaldaý nemese alyp júrý" boıynsha tirkelgen, –  dep habarlady qalalyq İİD baspasóz qyzmeti.

Buǵan deıin 5 qańtarda Almatyda polıseıler Dostyq dańǵyly men Ospanov kóshesi aımaǵyn qorshaýǵa alǵan bolatyn. Kýágerlerdiń aıtýynsha, sol jerde krımınalıser, órt sóndirýshiler, dárigerler, tipti áskerı adamdar bolǵan. Keıinirek Almaty qalasy DP-nyń baspasóz qyzmeti oqıǵaǵa qatysty túsinikteme berdi. "5 qańtarda saǵat 16.45-te Almaty polısıa departamentiniń jedel basqarý ortalyǵyna Dostyq dańǵylyndaǵy aıaldamadan granataǵa uqsas zat tabylǵany týraly úreıli habarlama tústi" delingen.