22 qańtarda Atyraýdaǵy ÝG-157/9 mekemesinde ótken kóshpeli sot qamaýdaǵy belsendi Maks Boqaevqa túrmeden shyqqan soń ákimshilik baqylaý taǵaıyndaý týraly Atyraý oblystyq qylmystyq atqarý júıesi departamentiniń (QAJD) ótinishin qanaǵattandyrdy. Bul týraly Azattyq radıosyna advokaty Janar Súndetqalıeva habarlady.

– Maks apelásıalyq shaǵym túsiremiz dedi. Sotta Makstyń ózi "men ózimdi saıası tutqynmyn dep sanaımyn. Kinálimin dep eseptemeımin. Qoǵamdyq uıymdar, halyqaralyq uıymdar, myńdaǵan adam isimniń saıasılanǵanyn biledi. Departamenttiń ótinishi de meni saıası kózqarasyma baılanysty qýdalap jatqanyn dáleldeı túsedi" dep aıtty, – dedi advokat.

Prokýror sotta Atyraý oblystyq qylmystyq atqarý júıesi departamentiniń ótinishin qoldap, Boqaevtyń "ekstremıstik sıpaty bar qylmys boıynsha" jazalanyp jatqanyn alǵa tartyp, tutqynnyń buǵan deıin mekemede ereje buzǵanyn da aıtqan. Al omyrtqasynda "gryjasy" baryn aıtqan Boqaev basqa mekemede jazasyn ótegen kezde túrme qyzmetkerleriniń beli aýyryp turǵanyna qaramastan tańerteń aıazda jattyǵý jasaýǵa májbúrlegenin jetkizgen. Soǵan shaǵymdanǵan kezde "ereje buzdy" dep aıyptalǵan.

– Ol "sizder desant daıyndamaısyzdar ǵoı, men syrtta emes, ishte jattyǵý jasaımyn" dep syrtqa shyǵýdan bas tartqan kezde "ereje buzdy" dep aıyptaǵan. Makstyń advokaty "Qazgıdrometke" habarlasyp, aýa raıyn suraǵan. Artynsha Boqaev syrtqa shyǵýdan bas tartqan kúni syrtta -26 -27 gradýs bolǵany anyqtalǵan. Al túrme erejesi boıynsha eger temperatýra -25-ten assa, onda syrtqa shyǵarmaýy tıis bolǵan. Sol sebepti Boqaev ol talappen kelispegen. Ony sol úshin "ereje buzdy" dep aıyptaǵan, – deıdi advokat.

Azattyq tilshisi ázirge Atyraý oblystyq qylmystyq-atqarý júıesinen jaýap ala almady.

Buǵan deıin sottyń onlaın túrde ótetini, oǵan jan-jaqtan baqylaýshylar men aqparat quraldary qatysa alatyny habarlanǵan. Biraq keıinirek sot "ınternet baılanysy nashar" dep prosesti túrmeniń ózinde ótkizýge uıǵarǵan. Oǵan baqylaýshylar qatysqan joq.

Maks Boqaevtyń jazasyn óteý ýaqyty 4 aqpanda aıaqtalady.

48 jastaǵy Maks Boqaev 2016 jylǵy qarashadan beri túrmede otyr. Bes jyl buryn, 24 sáýirde Atyraýda myńdaǵan adam alańǵa jınalyp, jerdi sheteldikterge jalǵa berýge qarsylyq bildirgen. Atyraýda bastalǵan narazylyq keıin eldiń basqa aımaqtarynda da jalǵasyp, bılik jerdi sheteldikterge jalǵa berýge ýaqytsha moratorıı jarıalaǵan.

Jer reformasyna qarsy mıtıńiden soń oǵan qatysqan atyraýlyq belsendiler – Maks Boqaev pen Talǵat Aıan bes jylǵa sottaldy. Olar "áleýmettik arazdyq týdyrdy", "jalǵan aqparat taratty" jáne "mıtıń ótkizý zańdaryn buzdy" dep aıyptaldy. Sot 2018 jyly sáýirde Aıannyń ótinishi boıynsha ony qamaýdan bosatqan. 2019 jylǵy shildede Atyraýdaǵy №2 qalalyq soty Talǵat Aıandy jazadan tolyq bosatty. Maks Boqaev "qamaýdan ýaqytynan buryn shyǵýǵa suranbaıtynyn, ózin tolyq aqtaýdy talap etetinin" málimdegen.