Semeı qalasyna jańa ákim taǵaıyndaldy. Bul týraly Shyǵys Qazaqstan oblysy ákimdiginiń baspasóz qyzmeti habarlady.

"Shyǵys Qazaqstan oblysy ákimi Danıal Ahmetovtiń ókimimen Semeı qalasynyń jańa ákimi taǵaıyndaldy. Búgin qalalyq máslıhattyń kezekten tys İİ sesıasynda depýtattar kópshilik daýyspen Nurymbet Saqtaǵanovtyń kandıdatýrasyn qoldady. Aıta keteıik, ol buǵan deıin Ulan aýdanynyń ákimi qyzmetin atqarǵan bolatyn" delingen habarlamada.

Jańa qala basshysyn aktıvke Danıal Ahmetov tanystyrdy. Burynǵy ákim Ermak Sálimov oblys ákiminiń turǵyn úı-qurylys máseleleri jónindegi keńesshisi bolady.

Nurymbet Amanuly Saqtaǵanov 1970 jyly 6 tamyzda Ońtústik Qazaqstan oblysynda dúnıege kelgen. Qyzylorda pedagogıkalyq ınstıtýtyn, Qyzylorda agrarlyq-tehnıkalyq kolejin, MESA dıstansıalyq bilim berý ınstıtýtyn, MESA Qyzylorda ekonomıka, statısıka jáne aqparat ınstıtýtyn, S. Amanjolov atyndaǵy Shyǵys Qazaqstan memlekettik ınstıtýtyn muǵalim, zańger, ekonomıka jáne bıznes mamandyqtary boıynsha támamdaǵan.

Eńbek qyzmetin 1992 jyly Qyzylordadaǵy № 172 orta mektebinde muǵalim bolyp bastaǵan.1993-1994 jyldary QR QK qatarynda bolyp, áskerden keıin Qyzylordadaǵy № 9 orta mektepte jumysyn jalǵastyrdy.

1995-2001 jyldary Qyzylorda oblysy boıynsha Keden basqarmasynyń ınspektory, aǵa ınspektory, bas ınspektory, bólim bastyǵy, bólim bastyǵynyń orynbasary bolyp jumys istedi.

2001-2006 jyldary - memlekettik kiris mınıstrligi keden komıtetinde bas ınspektor, tóraǵanyń kómekshisi, bólim bastyǵy (qarjy mınıstrliginiń keden komıteti, keden baqylaý agenttigi) boldy.

2006-2007 jyldary - QR parlamentindegi úkimet ókildiginiń bas ınspektory, ekonomıka jáne búdjettik josparlaý mınıstrliginde bólim bastyǵy, mınıstrdiń keńesshisi qyzmetin atqardy.

2007-2010 jyldary eńbek jáne halyqty áleýmettik qorǵaý mınıstrliginiń Kóshi-qon komıteti tóraǵasynyń orynbasary boldy.

2010-2012 jyldary Qazaqstannyń prezıdenti Ákimshiliginiń memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory.

2012-2015 jyldary Shyǵys Qazaqstan oblysy ákiminiń orynbasary qyzmetin atqardy.

2015-2018 jyldary Shyǵys Qazaqstan oblysy ákiminiń birinshi orynbasary boldy.

2018 jyldan búginge deıin Ulan aýdany ákimi qyzmetin atqardy.
Aıta keteıik, jańa ákim Nurymbet Amanuly jeti bala tárbıelep otyrǵan kópbalaly áke.