Úkimettiń keńeıtilgen otyrysynda prezıdent Qasym-Jomart Toqaev jer kodeksine túzetýler engizilýin qamtamasyz etýdi tapsyrdy.

Ol jer jónindegi komısıanyń jumysyn qaıta jandandyrý qajet ekenin atap ótti.

– Bıyl jer kodeksiniń jekelegen normalaryna jarıalanǵan moratorııdiń merzimi aıaqtalady. Osyǵan oraı, jer jónindegi komısıanyń jumysyn qaıta jandandyrý qajet. Usynystar baıyppen talqylanyp, túbegeıli sheshim qabyldanýǵa tıis.

Úkimetke bıylǵy qarasha aıyna deıin jer kodeksine túzetýler engizilýin qamtamasyz etýdi tapsyramyn, – dedi Toqaev.

Memleket basshysy jergilikti ákimdikter jumysty durys uıymdastyrmaǵandyqtan aýyl turǵyndary mal jaıatyn jaıylym tappaı qınalyp jatqanyn aıtty.

– Jaıylymdar máselesine arnaıy toqtalǵym keledi. Bul jerler, eń aldymen, aýyl turǵyndaryna qoljetimdi bolýy kerek. Jergilikti ákimdikter jumysty durys uıymdastyrmaı otyr. Sonyń saldarynan, aýyl turǵyndary mal jaıatyn jaıylym tappaı qınalýda.

Jaıylymdardyń 99 paıyzy sharýa qojalyqtarynyń ıeliginde. Alaıda onyń 36 paıyzynda ǵana mal jaıylady. Qalǵan 46 mıllıon gektar jaıylymdyq jer bos jatyr. Úkimetke bas prokýratýramen birlesip, bıylǵy jyldyń sońyna deıin osyndaı jaıylymdardy qaıtaryp alýdy tapsyramyn, – dedi ol.