Áleýmettik jelide ózin "Artem, Rýdnyı qalasynanmyn" dep tanystyrǵan adam Reseı dýmasy depýtattarynyń Qazaqstan jeri týraly aıtqan daýly málimdemeleri men mundaı depýtattarǵa ishi jylıtyn qazaqstandyqtar týraly ne oılaıtynyn jetkizgen vıdeo tarap jatyr.

– Áldebir kireberisterde aıtylyp jatqan áńgimelerge qatysty bylaı degim keledi: qazaqtar, sizder bizge baýyrsyzdar. Orystardyń barlyǵy ondaı emes. Ant bergen, sol antyna adal durys jigitter de bar, – degen ol reseılik depýtattardyń sózin qoldaýshylar "áskerde bolmaǵandar nemese ant qabyldaı turyp, ony jete túsinbegender" dep esepteıtinin aıtqan.

"Qazaq jerin ońaı ala qoıa almaısyńdar. Men muny reseılik barlyq depýtatqa aıtyp otyrmyn. Men qazaq halqyna ant bergem, Qazaqstan úshin ómirimdi qıýǵa ázirmin" delingen vıdeoda.

Onyń aıtýynsha, osylaı isteýge daıar turǵan kóptegen etnostar bar.

Sonymen qatar ol qazaq tilin úırenýge shaqyryp, ózi sekildi oıyn ashyq bildirgisi keletinder az ekenin aıtty. Sózinshe, olardy ustanymy úshin sógýi múmkin.

– Men ant qabyldap, áskerde bolǵan jigitterge "Otandy satpaıyq" dep qadap aıtqym keledi, – dedi ol.

Búǵan deıin Reseı dýmasynyń birneshe depýtaty Qazaqstan jeri men onyń tutastyǵy týraly "Qazaqstan jeri Reseı tarapynan jasalǵan syılyq" degen maǵynada arandatýshylyq sózder aıtqan. Bul daýly málimdemeder Qazaqstanda qyzý talqylanyp, azamattardyń narazylyǵyn týdyrǵan.

Reseı bıligi depýtattardyń sózi "resmı ustanymdy bildirmeıdi" degen.

Qazaqstan bıligi daýly málimdemelerge narazylyq retinde aldymen syrtqy ister mınıstrligi arqyly arnaıy nota joldady. Artynsha prezıdent Q.Toqaev 2020 jylǵy 31 jeltoqsanda qazaqstandyqtardy jańa jylmen quttyqtaý sátinde, 2021 jylǵy 5 qańtarda jarıalaǵan maqalasynda "ulttyq múddeni aspen de, taspen de qorǵaýǵa daıyn bolýymyz kerek" dep málim etken.