Jańaózende "Munaıspessnab Kompanı" JSHS qyzmetkerleri eńbekaqysyn arttyrýdy talap etip, ereýilge shyqty, dep habarlady Lada.kz saıty.
Mańǵystaý oblysy memlekettik eńbek ınspeksıasy basqarmasynyń habarlaýynsha, "Munaıspessnab Kompanı" JSHS kólik qyzmetin usynady. Kompanıa negizgi tapsyrys berýshisi "Ózenmunaıgaz" aksıonerlik qoǵamymen jumys isteý úshin Jańaózen qalasynan 300-ge jýyq jeke kásipkerdi jaldaǵan.
– Búgingi tańda jaldanǵan kásipkerlerdiń 65-i saǵatyna 1 300 teńge kólemindegi tarıftik tólemdi 1 400 teńgege arttyrýdy talap etip jatyr, – dedi Mańǵystaý oblysy memlekettik eńbek ınspeksıasy basqarma basshysynyń orynbasary Nuraly Baýlybaev.
Nuraly Baýlybaevtyń aıtýynsha, qazirgi tańda "Munaıspessnab Kompanı" JSHS men "Ózenmunaıgaz" AQ arasynda kelissóz júrip jatyr.
– "Munaıspessnab Kompanı" JSHS osy jeke kásipkerlermen azamattyq-quqyqtyq sıpattaǵy shart jasaǵandyǵyn aıta ketý kerek. Demek bul janjal jumys berýshi men jumysshy arasyndaǵy eńbek daýy bolyp tabylmaıdy. Sondyqtan bul daý basqarmanyń quzyretine kirmeıdi. Jeke kásipkerler bul máseleni tapsyrys berýshi nemese sot organdary arqyly sheshýi kerek, – dedi Baýlybaev.
Eske salsaq, keshe, 1 aqpan kúni "Munaıspessnab Kompanı" JSHS jumysshylary jalaqyny kóterýdi talap etip, aksıaǵa shyqqan bolatyn.
