Jazýshy, dramatýrg, Qazaqstannyń eńbek sińirgen qaıratkeri Ánes Saraı qaıtys boldy. Bul týraly aqparat jáne qoǵamdyq damý mınıstri Aıda Balaeva facebook paraqshasynda habarlady.

– Búgin halqymyzǵa tanymal daryndy jazýshy, zıaly azamat, belgili qoǵam qaıratkeri Ánes Saraı aǵamyz ómirden ozdy..

Ókinishke qaraı, ýaqyt alǵa jyljyǵan saıyn aldyńǵy býyn aǵa-apalarymyz máńgilik saparǵa attanyp jatyr. Ómir bar jerde – ólim bar desek te, bul – bir áýlettiń ǵana emes, ádebıet súıer qaýymy bar búkil qoǵam úshin orny tolmas aýyr qaıǵy bolyp otyr.

Rýhanıat salasyna qatysty talaı iste aǵamyzdyń aldyn kórip, aǵalyq aqylyn tyńdap, jaqyn syılastyqta aralasqan edik.

Aǵamyzdyń jarqyn beınesi men ádebıet álemindegi shyǵarmalary qalyń oqyrman qaýymnyń rýhanı oljasyna aınalyp, halyq jadynda máńgi saqtalady.

Aǵamyzdyń qazasyna baılanysty – Altynshash Jaǵanova apamyzǵa jáne barlyq aǵaıyn-týys, jaqyndarynyń qaıǵylaryna ortaqtasyp, kóńil aıtamyn, – dep jazdy mınıstr paraqshasynda.

Saraı Ánes Tólendiuly – jazýshy, dramatýrg, Qazaqstannyń eńbek sińirgen qaıratkeri. 1937 jyly Reseıde, Astrahan oblysy, Volodarskıı aýdany, Kirmalaı aýylynda týǵan. QazUÝ-dy bitirgen. "Egemen Qazaqstan", "Jas Alash" gazetterinde ádebı qyzmetker, bólim meńgerýshisi, "Jazýshy" baspasynda redaktor, Qazaqstan jazýshylar odaǵynda ádebı keńesshi bolyp qyzmet atqarǵan. Ol Batys Alashorda tarıhyn qamtıtyn "Edil-Jaıyq" romanynyń jáne Alash kozǵalysyna qatysty derekti materıaldardyń avtory bolǵan.

"Munaralar shaqyrady" (1969), "Bozqyraý" (1973), "Qarasha ótken soń" (1974) atty áńgime-povesterinde, "Tosqaýyl" (1976), "Altyn aral" (1984), "Edil—Jaıyq" (1994) romandarynda Astrahan-Atyraý óńiri eńbekkerleriniń ómirin, tynys-tirshiligin arqaý etken. "Muhammed paıǵambardyń ómiri", "Isataı men Mahambet", "Qý tazsha", "Toıtıyp qaldy", "Arý Almaty",  "Muńym meniń", "Ańsaý" pesalarynyń avtory. QR memlekettik syılyǵynyń laýreaty (1996).