Sybaılas jemqorlyqqa qarsy is-qımyl agenttiginiń baspasóz qyzmeti Almaty oblysy Talǵar aýdanynyń ákimi Serikjan Erekeshov para alý deregimen qamaýǵa alynǵanyn rastady.

"Almaty oblysy sybaılas jemqorlyqqa qarsy qyzmet Talǵar aýdany ákimdiginiń laýazymdy tulǵalaryna qatysty para alý deregi boıynsha sotqa deıingi tergeý júrgizip jatqanyn habarlaımyz. Talǵar aýdanynyń ákimine qatysty tergeý soty "kúzetpen ustaý" bultartpaý sharasyn sanksıalady" delingen agenttik habarlamasynda.

Buǵan deıin Almaty oblysy jemqorlyqqa qarsy kúres qyzmetiniń mamandary aýdan ákimi Serikjan Erekeshevti para aldy degen kúdikpen ustaǵany habarlanǵan.

Sheneýnik merdiger uıym dırektorynan oryndalǵan jumystar aktisine qol qoıǵany úshin 10 mln teńge para aldy degen kúdikke ilingen.

Serikjan Erekeshev Talǵar aýdanynyń ákimi qyzmetine 2020 jyldyń tamyz aıynda taǵaıyndalǵan bolatyn.