Saıt málimetinshe, jıyndy ashqan qaýipsizdik keńesiniń tóraǵasy ulttyq qaýipsizdikke qatysty qalyptasqan syn-qaterler transformasıaǵa ushyrap, assımetrıalyq ári gıbrıdtik qaterler týyndap jatqanyn aıtqan.

Kún tártibindegi birinshi máseleni talqylaý barysynda prezıdenttiń kómekshisi – qaýipsizdik keńesiniń hatshysy Á.Isekeshev jańa Strategıanyń negizgi baǵyttaryn tanystyrdy. Onda qamtylǵan sharalarǵa táýekelderdi basqarýdyń zamanaýı ádisteri basshylyqqa alynyp, ulttyq qaýipsizdik teńgerimdi áleýmettik-ekonomıkalyq jáne qoǵamdyq-saıası damýmen berik baılanysqan.

Nursultan Nazarbaev bıologıalyq qaýipsizdik máselesi kún tártibinen uzaq ýaqytqa deıin túspeıtinine nazar aýdardy, sebebi ınfeksıalyq jáne basqa da aýrýlar jahandyq syn-qaterlerge aınaldy. Osyǵan oraı Elbasy bıologıalyq qaýipsizdik pen qoǵamdyq densaýlyq saqtaý salasyndaǵy basty qaýip-qaterlerge toıtarys berý úshin tıimdi sharalardyń mańyzdylyǵyn atap kórsetti.

Nursultan Nazarbaev ekonomıkalyq qaýipsizdikti, kıberqaýipsizdikti, aqparattyq qaýipsizdik pen adamı kapıtaldyń qaýipsizdigin qamtamasyz etý máselelerine erekshe nazar aýdardy.

Sonymen qatar Elbasy ulttyq qaýipsizdiktiń dástúrli túrleri – syrtqy jáne áskerı qaýipsizdikke toqtaldy. Mundaǵy negizgi syn-qaterler syrtqy kúshterdiń ózara teketiresine, Ortalyq Azıa men onyń tóńireginde turaqsyz aımaqtardyń qurylý múmkindigine, terorıstik, radıkaldy, qylmystyq jáne basqa da iritki salýshy kúshterdiń óńirde shoǵyrlanýyna baılanysty.

Talqylaý qorytyndysy boıynsha otyrysqa qatysýshylar Qazaqstan Respýblıkasynyń jańa Ulttyq qaýipsizdik strategıasynyń tujyrymdyq ustanymdaryn maquldady.

Sondaı-aq, talqylaý barysynda Qazaqstan Respýblıkasynyń áskerı qaýipsizdigin laıyqty qamtamasyz etýge tıis qarýly kúshterdi damytý máseleleri qaraldy.

Elbasy jańa tehnologıalar engizýdi jáne qarý-jaraq pen áskerı tehnıka óndirisindegi tehnologıalyq progresti esepke ala otyryp, qarýly kúshterdi jetildirý qajettigine de toqtaldy.

– Qarýly kúshterdi 2030 jylǵa deıin qaıta jaraqtandyrý jáne qorǵanys ónerkásibin damytý tujyrymdamasy armıany jabdyqtaýdyń uzaq merzimge arnalǵan tásilderin aıqyndaıdy jáne jańa tehnologıalyq syn-qaterlerge saı keledi. Otandyq qorǵanys ónerkásibi – qorǵanys qabiletiniń mańyzdy bóligi, ol Qarýly kúshterdiń suranysyna baǵyttalǵan, – dedi Nazarbaev.