Premer-mınıstr Asqar Mamın Almaty qalasyna jumys sapary barysynda qalanyń áleýmettik-ekonomıkalyq damýy máseleleri jóninde keńes ótkizdi, dep habarlady primeminister.kz saıty.

Almaty qalasynyń ákimi Baqytjan Saǵyntaev jáne onyń orynbasarlary úkimet basshysyna baıandama jasady. 

Kezdesýde ınjenerlik, kólik jáne turǵyn úı ınfraqurylymyn damytý, bilim berý jáne densaýlyq saqtaý, kásipkerlik jáne ınvestısıalar tartý, qorshaǵan ortany qorǵaý jáne Almaty qalasyn gazdandyrý máseleleri qaraldy. Almaty aglomerasıasyn damytý jáne 2020-2024 jyldarǵa arnalǵan "Jańa Almaty" keshendi josparyn iske asyrý máselelerine erekshe kóńil bólindi. 

– Almaty qalasy eldiń JİÓ-niń besten bir bóligin qamtamasyz ete otyryp, áleýmettik-ekonomıkalyq damý kórsetkishteri boıynsha óńirler arasynda jetekshi orynǵa ıe. Megapolıstiń odan ári aıtarlyqtaı damý áleýeti bar. Jańa jumys oryndaryn qurý, qala turǵyndarynyń ómir súrý sapasy men ál-aýqatyn arttyrý, ınfraqurylymdy jáne jalpy alǵanda, Almaty aglomerasıasynyń ekonomıkasyn damytý úshin barlyq jaǵdaıdy jasaý qajet, – dedi Mamın.

Úkimet basshysy barlyq josparlanǵan jobalardy ýaqytyly jáne sapaly júzege asyrýdy, sondaı-aq Almaty qalasyn odan ári damytýǵa ınvestısıalar tartýdy qamtamasyz etýdi tapsyrdy.

Resmı saıttyń habarlaýynsha, 2020 jyldyń qorytyndysy boıynsha Almaty qalasynda ónerkásip óndirisiniń kólemi 2019 jylmen salystyrǵanda 4,6%-ǵa 1,052 trln teńgege deıin ósken, onyń ishinde óńdeý ónerkásibi 6,9%-ǵa (mashına jasaý 35,8%-ǵa, farmasevtıka 43,5%-ǵa, qaǵaz óndirý 95,6%-ǵa, jeńil ónerkásip 5 ese) artqan.

"2021-2024 jyldary Almaty qalasynda 35,4 myń jańa jumys ornyn qura otyryp, jalpy quny 4,5 trln teńge bolatyn 201 ınvestısıalyq jobadan turatyn pýl quryldy. Bıyl 7 myńnan astam jumys ornyn asha otyryp, 187,9 mlrd teńgege 92 jobany iske asyrý josparlanýda" delingen habarlamada.