Memleket basshysy mádenıet jáne sport mınıstri Aqtoty Raıymqulovany qabyldady, dep habarlady Aqorda saıty. 

"Raıymqulova prezıdentke mádenıet, sport, týrızm, arhıv, kınematografıa salalarynda atqarylǵan jumystar týraly esep berdi. Sonymen qatar bıyl ótetin táýelsizdiktiń 30 jyldyǵy, jyr alyby Jambyl Jabaevtyń 175 jyldyǵy, kúsh atasy Qajymuqan Muńaıtpasulynyń 150 jyldyǵyn jáne ózge de ataýly mereıtoılyq datalardy atap ótýge baılanysty jasalatyn jumystardyń jaıy baıandady.

Mınıstr Sháken Aımanov atyndaǵy "Qazaqfılm" stýdıasy men ulttyq kınony qoldaý memlekettik ortalyǵynyń jumysy, "Kınematografıa týraly" zańǵa engiziletin tolyqtyrýlar jóninde aıtty. Memleket basshysyna Tokıo olımpıadasyna daıyndyq jumysy, balalar men jasóspirimderge arnalǵan shyǵarmashylyq úıirmeler men sport seksıalaryna jan basyna shaqqandaǵy qarjylandyrý júıesin engizý boıynsha málimet berdi" delingen aqparattyq habarlamada

Aqtoty Raıymqulova pandemıa kezinde ishki týrızmge suranystyń arta túskenin jetkizgen. Salany yntalandyrýdyń tıimdi tetikteriniń biri – balalardyń demalys oryndaryna ushaqpen barýyn sýbsıdıalaý ekenin, osyǵan qatysty tıisti túzetý "Týrızm qyzmeti týraly" zań jobasyna engizilip, respýblıkalyq búdjettik komısıa tarapynan qoldaý tapqanyn atap ótken.

Kezdesý sońynda Qasym-Jomart Toqaev Aqtoty Raıymqulovaǵa ıdeologıalyq, tárbıelik mańyzy zor jumystardy, "Rýhanı jańǵyrý" baǵdarlamasyn, sıfrlandyrý boıynsha qolǵa alynǵan bastamalardy sapaly jalǵastyrý, mınıstrliktiń onlaın jobalaryn jandandyrý jóninde tapsyrma berdi.