Táýelsizdiktiń 30 jyldyǵyn merekeleýge daıyndyq jónindegi memlekettik komısıanyń birinshi otyrysynda prezıdent Toqaev merekeni atap ótý barysy jaıly aıtty.

Saıt málimetinshe, Qasym-Jomart Toqaev merekeleý barysynda táýelsiz Qazaqstannyń negizin qalaýshy tuńǵysh prezıdenttiń tarıhı róli erekshe atalyp, elbasy saıasatynyń sabaqtastyǵy barlyq is-sharalardyń ıdeologıalyq ózegi bolýy shart ekenin atap ótken.      

Memleket basshysy táýelsizdikti atap ótkende, elge ózgeris ákelmegen is-sharalar týraly esep berýdiń qajeti joq ekenin aıtty.

– Táýelsizdikti atap ótkende tálimdik, tárbıelik máni bar aqparatty usynyp, jurtty tartatyn jańa stıldi, jańa formatty kóbirek engizý qajet. Ár jerde ótkizilgen is-sharalar týraly qurǵaq eseptiń qajeti joq. Elge ózgeris ákelmese, myńdaǵan madaqqa toly maqalalardan esh qaıyr bolmaıdy, – dedi Toqaev.

Komısıa otyrysynda memlekettik hatshy Qyrymbek Kósherbaev, prezıdent ákimshiligi basshysynyń birinshi orynbasary Dáýren Abaev, premer-mınıstrdiń orynbasary Eraly Toǵjanov, premer-mınıstrdiń orynbasary – syrtqy ister mınıstri Muhtar Tileýberdi, aqparat jáne qoǵamdyq damý mınıstri Aıda Balaeva sóz sóıledi.