Prezıdent Qasym-Jomart Toqaev "ArselorMıtall" kompanıasynyń basqarma tóraǵasy Lakshmı Mıttalmen kezdesý ótkizdi, dep habarlady Aqorda saıty.

Lakshmı Mıttal prezıdent Toqaevqa "ArselorMıtall Temirtaý" kompanıasynyń 2020 jylǵy jumysynyń nátıjeleri men 2021 jylǵa arnalǵan josparlary týraly aqparat berdi.

Kezdesý barysynda óndiristerdi jańǵyrtý, ekologıalyq ahýaldy jaqsartý, óndiriletin ónim túrlerin keńeıtý máseleleri talqylandy.

"Memleket basshysy óndiris qýatyn jańǵyrtýǵa jáne arttyrýǵa tartylatyn ınvestısıalar kólemin ulǵaıtý qajettigin aıtty. Keme jasaý, avtokólik ónerkásibi jáne elektrotehnıkalyq óndiris salalary boıynsha jańa taýarlar shyǵarý mańyzdy mindet bolýy kerek" delingen habarlamada.

Áńgimelesý barysynda taraptar atmosferaǵa bólinetin qaldyqtardy azaıtý, onyń ishinde, agloónerkásipte, konvertorlarda, koksohımıalyq óndiris pen JEO-2-de ekologıalyq jabdyqtardy jańǵyrtýǵa qatysty kompanıanyń josparlaryna erekshe kóńil bóldi.

Qasym-Jomart Toqaev óndiristegi jaraqat alý jaǵdaılaryn azaıtý, kompanıanyń sheteldik jáne otandyq jumysshylary arasyndaǵy eńbekaqy kóleminiń alshaqtyǵyna jol bermeý boıynsha tapsyrma berdi.

Beınebaılanys formatynda ótken kezdesýge premer-mınıstrdiń orynbasary Roman Sklár, prezıdent ákimshiligi basshysynyń orynbasary Tımýr Súleımenov, Qaraǵandy oblysynyń ákimi Jeńis Qasymbek qatysty.