Qazaqstannyń bas santar dárigeri Erlan Qıasov elde karantın sharalary ár aımaqtaǵy epıdemıologıalyq ahýaldyń jaqsarǵanyna baılanysty jeńildeıtinin málim etti.

Onyń aıtýynsha, buǵan deıin aýrýdyń órshýi týraly jasalǵan boljam ózektiligin joıǵan joq.

2021 jylǵy 18 qańtarda jasalǵan boljamda 2021 jylǵy naýryzda kúnine 3 myńǵa deıin adamnan koronavırýs anyqtalýy múmkin ekeni habarlanǵan.

Bas sanıtar aýrýdyń taralýy baqylanǵan túrde ósetinin, alaıda byltyr jazdaǵy jaǵdaıdan aspaıtynyn jetkizdi.

– Boljam qazirgi shekteý sharalaryn eskere otyryp jasalǵan bolatyn. Búgingi oń kórsetkishter, epıdemıologıalyq ahýal nashar aımaqtarda der kezinde qolǵa alynǵan nysanaly sharalarmen baılanysty, –  dedi ol.

Onyń aıtýynsha, uzaqmerzimdi boljamdar aýyq-aýyq jasalyp turady.

Densaýlyq saqtaý mınıstrligi málimetinshe, Qazaqstanda sońǵy úsh kúnde koronavırýstyń taralýy báseńdeı túsken. 9 aqpandaǵy aqparattyq habarlamada bir táýlikte vırýs anyqtalǵan adamdar sany 1 myńnan azaıǵany aıtylady.

9 aqpandaǵy málimet boıynsha,  26 380 adam koronovırýs ınfeksıasynan emdelýde, olardyń ishinde 5 560 pasıent stasıonarda, 20 820 naýqas ambýlatorıalyq deńgeıde em qabyldaýda. Vırýs juqtyrǵandar arasynda 261 adamnyń jaǵdaıy aýyr, 50 pasıenttiń jaǵdaıy óte aýyr, 41 naýqas ÓJJ apparatynda jatyr.