Parlament májilisiniń eń jas depýtaty Mádı Ahmetov facebook paraqshasynda 1 aıda atqarǵan jumystary týraly jazdy.
Onyń aıtýynsha, búgin qyzmetke kiriskenine týra 1 aı bolǵan. Osy aralyqta "Ekologıa máseleleri jáne tabıǵatty paıdalaný" komıtetine múshe bolyp, zań jobalary boıynsha úsh jumys tobyna kirgen.
– Ótken aptada zoom arqyly Nur Otan partıasynyń qoǵamdyq qabyldaý bólmesinde 7 aımaqtan 15 azamatty qabyldadym. Qabyldaý barysyndaǵy ótinishterdiń basym kópshiligi áleýmettik salaǵa qatysty. Atap aıtqanda, jumysqa ornalastyrý, úı máselesin sheshý, kvota arqyly ota jasaý, múgedektigi bar azamattardyń jaǵdaıyn jaqsartý, aýyldaǵy ınternet máseleleri kóterildi.
Sonymen qatar, aryz berýshiler jergilikti memlekettik organdardyń azamattardyń máselelerin sheshýdegi nemquraılyǵyn jetkizdi. Qabyldaýdyń qorytyndysy boıynsha arnaıy hattama ázirlenip, ár ótinish baqylaýǵa alynyp, jaýapty memlekettik mekemelerge joldandy.
Sondaı-aq Nur Otan partıasynyń respýblıkalyq qoǵamdyq qabyldaý bólmesinde aqpan aıynda birqatar Úkimet músheleri de azamattardy qabyldaıdy, – dep jazdy depýtat.
Pikir qaldyrý