Májilistiń jalpy otyrysynda "Nur Otan" partıasy fraksıasynyń músheleri Erlan Saırov pen Elnur Beısenbaev aýyldaǵy kedeılik pen ony sheshý joldary máseleleri týraly úkimet basshysy Asqar Mamınge resmı saýal joldady.

"Bul máseleni sheshýdiń ońtaıly ádisi ál-aýqaty tómen azamattardy mıkrokredıtpen qamtamasyz ete otyryp, adamdardyń bıznes-saýatyn arttyrý" degen depýtattar "Eńbek" baǵdarlamasynyń nesıelendirý baǵyty boıynsha bıylǵy jyldyń búdjeti 20 mlrd teńgeni qurap otyrǵanyna, shaǵyn nesıe alýshylardyń sany 5200-ge azaıǵanyna nazar aýdardy.

– Mıkrokredıtteýdegi basty problema – kepilzat máselesi. Bul problemany nesıege kepildik berý mehanızmin engizý arqyly naqty sheshetin ýaqyt jetti. Bıyl Atameken jáne jergilikti ákimdikterdiń qatysýymen shaǵyn nesıe uıymdaryn ashý josparlanyp otyr. Nıet durys, biraq óziniń tıimdiligin kórsete bilgen, ońtaıly jumys istep turǵan, 10 jyl shaǵyn nesıe berý tájirıbesi bar aýylsharýashylyǵyn qarjylaı qoldaý qory ne sebepti jabylmaq? Memleket, qarapaıym halyq múddesi turǵysynan qordy saqtaý qajet! Óıtkeni, ózderi qınalyp otyrǵan aýyldaǵy usaq sharýalar men zárý adamdar qarjy kózinen múldemge qaǵylý qaýpi basym, – dedi depýttar.

"Nur Otan" partıasy fraksıasynyń músheleri aýylda mıkro-bıznesti damytýdyń basty aspektisi – tutyný jáne qyzmet kórsetý kooperatıvterin qurý dep sanaıdy.

– Halyqaralyq tájirıbede bul kooperatıvter ónimdi óńdeý, ótkizýge kómektesý, veterınarıa, mal azyǵyn daıyndaý boıynsha qyzmet kórsetý, jańa tehnologıa, jańa tuqymdar jóninde bilim taratýmen aınalysady. Osyndaı kooperatıvterdi ásirese shalǵaı eldi mekenderde qurý óte ózekti. Shalǵaı eldi mekenderge arzandatylǵan mıkro nesıe jetkizýdiń de ınfraqurylymyn jasaý mańyzdy. Bankiler men mıkrokredıt uıymdary qala janyndaǵy eldi mekenderdi ǵana qamtıdy. Alystaǵy aýyl arzan nesıege zárý, jetkizetin amal joqtyń qasy, – deıdi olar.