Almatyda eki kúnnen beri tergeý ızolátorynan qashyp ketken adam izdestirilip jatyr. Bul týraly jýrnalıs Mıhaıl Kozachkov telegram-da habarlady. Qylmystyq atqarý júıesi komıtetiniń mamandary oqıǵa 15 aqpanda bolǵanyn rastady.
Jelide taraǵan aqparatta kúdikti 15 aqpanda 15:00 men 17:00 aralyǵynda qoǵamdyq qorǵaýshymen kezdeskeni aıtylady. Kezdesýden keıin kúdikti dárethanaǵa suranyp, artynsha kezdesý bólmesinde jasyrynyp qalǵan. Ol jerde qas qaraıǵansha otyryp, saǵat 20:30-da ákimshilik ǵımarattyń akt zalyna ótip, sol jerdegi qosymsha temir esikti buzyp, qashyp ketken. Bir qyzyǵy, onyń joqtyǵy kelesi kúni baryp anyqtalǵan.
Aqparatty rastaǵan qylmystyq atqarý júıesi komıtetiniń mamandary oqıǵa Almatydaǵy LA-155/18 mekemesinde bolǵanyn habarlady. Qashyp ketken adamnyń aty-jóni D.T. Davýtov. 1987 jyly týǵan. Atalǵan derek boıynsha Almaty polısıa departamenti qylmystyq kodekstiń 426-babyna saı (Bas bostandyǵynan aıyrý oryndarynan, qamaqtan nemese kúzetten qashý) tergeý bastaǵan, izdeý sharalary júrýde. Oqıǵanyń mán-jaıyn anyqtaý úshin qyzmettik tekseris bastaldy. Jaýapty laýazymdy tulǵalarǵa tıisti shara qoldanylmaq.
Pikir qaldyrý