Prezıdent Qasym-Jomart Toqaev Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsındi qabyldady.

Mınıstr Toqaevqa mınıstrliktiń 2020 jyldyń qorytyndysy boıynsha atqarǵan jumystary, sıfrlandyrýdyń damý perspektıvalary, sondaı-aq, ınternet baılanysyna, sonyń ishinde, prezıdenttiń halyqqa Joldaýyndaǵy aýyldyq jerlerde qol jetimdilikti arttyrýǵa baǵyttalǵan tapsyrmalarynyń oryndalý barysy týraly esep berdi.  

Baǵdat Mýsın baılanys sapasynyń talaptary bekitilgeni jóninde baıandap, endi 3G/4G jelileri úshin sapanyń tómengi shegi anyqtaldy. Buǵan deıin baılanys sapasynyń tómengi shegi reglamenttelmegen bolatyn.

Sonymen qatar radıotolqyndardy aýksıon formatynda anyqtaý jónindegi zańnamaǵa engiziletin ózgerister ázirlendi. Bul 5G jelisine kóshýde mańyzdy ról atqarady.

Sondaı-aq engiziletin ózgeristerge sáıkes baılanys sapasynyń parametrlerin buzǵany úshin salynatyn aıyppul kólemi 1000 aılyq eseptik kórsetkish bolmaq.

Mınıstr eGov mobile mobıldi qosymshasyna bıometrıalyq sáıkestendirý júıesin engizý jaıynda aıtty. Bul halyqtyń memlekettik qyzmet kórsetý júıesine tirkelip, qyzmet alý ýaqytyn edáýir qysqartýǵa múmkindik beredi. Qasym-Jomart Toqaev atalǵan qosymsha arqyly memlekettik qyzmet kórsetý jumystaryn tezdetýdi tapsyrdy.