Sıdneı Olımpıadasynyń chempıony, Almaty qalasy máslıhatynyń depýtaty Ermahan Ibraıymov mıtıńke shyǵýynyń sebebin túsindirip, óziniń namysyna tıgen sózderge jaýap berdi.

– Halyqtyń kóbisi mıtıńke boksshy kelse urý úshin keldi dep oılaıdy. Men halyqty urý úshin júgirgenim joq. Men "Nur Otan" partıasy atynan depýtattyqqa úmitker retinde tirkeldim. Sondyqtan halyq alańda aıqaılap tura bergennen bir mámilege kelip, sóılespekshi boldym.

Men sol kúni qara maskada turdym. Halyq sonda da meni tanyp qoıdy. Tanysa da tura berdim. Tanydy-aý dep qastaryna barǵanymda olar "Ermahan bizdi urýǵa keldi" dep oılady. Sodan eki áıel meniń kókiregimnen ıterip, "Ermahan ket", "Ermahan sen onbaǵansyń", "Sen halyqtyń satqynysyń" dedi. Men olarǵa bir aýyz sóz aıtpastan jabyla bastady.

Árıne men eshkimdi kinálamaımyn. Meniń namysyma tıgeni "Ermahan sen "Nur Otan" partıasynyń quıyrshyǵysyń, sen solardyń sózin sóıleısiń", "Sen halqyńdy sattyń" degen sózder. Men eshkimniń quıyrshyǵy emespin. Men halyqpen ashyq dıalog qurý úshin keldim, – dedi boksshy. 

Eske sala keteıik, saılaýǵa boıkot jarıalap 10 qańtar kúni alańǵa shyǵyp, arnaıy jasaq qorshaýynda bolǵan "Demokratıalyq partıa" bastamashyl tobyn sabyrǵa shaqyrýǵa tyrysqan Ermahan Ibraımov narazy toppen janjaldasyp qalǵan bolatyn.