Qazaqstandyq kásipqoı boksshy Qanat Islam kezekti kezdesýinde jeńiske jetkennen keıin meksıkalyq boksshy Saýl Alvaresti judyryqtasýǵa shaqyrdy.

– "Kanelo", vamos! Sen meni kórip otyrsyń, baqyttysyń, meni jaqsy kóresiń! Kel, jekpe-jekke shyǵaıyq, – dedi Islam.

Qazaqstandyq boksshy búgin ekvadorlyq Djeıson Mındadan basym tústi. Bastapqyda 35 jastaǵy Islamnyń qarsylasy 33 jastaǵy ganalyq Obodaı Saı bolatyny habarlanǵan. Biraq keıin ózgergen.

10 raýndqa josparlanǵan kezdesý jetinshi raýndta aıaqtaldy. Qanat Islam qarsylasyn aldymen tórtinshi raýndta nokdaýnǵa túsirdi. Jetinshi raýndta referı taǵy da bir nokdaýn tirkedi. Artynsha  qazaqstandyq boksshy sol raýndta ekvadorlyq boksshyny nokaýtqa jiberip, jeńiske jetti.

Osylaısha, Qanat Islam kásipqoı bokstaǵy 28-shi jekpe-jeginde 28-shi ret jeńimpaz atanyp otyr. Onyń 22-sinde qarsylastaryn nokaýtqa jibergen.