Almaty oblysynda demalys kúnderi lokdaýn engiziledi. Bul týraly úkimet otyrysynda óńirdegi sanıtarlyq-epıdemıologıalyq jaǵdaı týraly qysqasha baıandaǵan oblys ákimi Amandyq Batalov málimdedi.

Sońǵy aptada koronavırýspen aýyrǵandardyń ósý qarqyny Almaty oblysynda 0,6 prosentti qurap, ótken táýlikte 99 jaǵdaı tirkelgen.

Infeksıalyq stasıonardyń tolymdylyǵy 43 paıyzdy, reanımasıalyq tósekter tolymdylyǵy 15 paıyzdy qurap otyr. 

Óńir basshysynyń aıtýynsha, oblystyń medısınalyq uıymdary qajetti jabdyqtarmen jáne dárilik preparattarmen qamtamasyz etilgen. Infeksıalyq stasıonardaǵy tósek sany 412-ge kóbeıtilip, qazir sany 1 550 birlikke jetkizilgen.

Bıylǵy jyldyń basynan bastap 11 PSR-zerthanasynda 137 myń test ótkizilgen. 391 mobıldi brıgada koronavırýs kúdigi bar naýqastardyń úıine baryp 50,7 myńnan astam medısınalyq qyzmet kórsetti.

Oblysta aýrý deńgeıiniń ósýine baılanysty karantındik rejım kúsheıtildi.

Belgili bolǵandaı, mektepke deıingi mekemelerdiń, qoǵamdyq tamaqtaný obektileriniń, dinı uıymdarynyń, qoǵamdyq monshalar men kóliktiń jumysy saǵat 17:00-ge deıin, oıyn-saýyq obektileri men meıramhanalardyń jumysy saǵat 21:00-ge deıin kelýshiler sanyn eskere otyryp shekteldi. Demalys kúnderi oblysta tolyq lokdaýn engiziledi.

– Almaty qalasy men oblys arasynda halyq kóshi-qonynyń jıileýine baılanysty qala mańyndaǵy Jambyl, Qarasaı, Talǵar, Eńbekshiqazaq, İle aýdandarynda aýrý deńgeıiniń birshama ósýi baıqalady. Bas sanıtar dárigerler shekteý sharalaryn kúsheıtý jóninde jekelegen qaýlylar qabyldady, – dedi Batalov.

Óńirde karantın sharalaryn saqtaý jónindegi monıtorıńtik toptardyń jumysy kúsheıtildi.

1 qańtardan bastap 6797 reıd barysynda karantın rejımin buzýdyń 449 jaǵdaıy anyqtaldy, 410 hattama toltyrylyp, aıyppul salyndy.

Koronavırýs ınfeksıasyna qarsy vaksına salý 30 egý pýnktinde júrgiziledi, 6883 adamǵa ekpe jasaldy.

Qazir Almaty oblysy "sary" aımaqta tur. Aýrýhanalarda 685 adam em qabyldap jatyr, onyń 22-siniń jaǵdaıy aýyr.