Qazaqstannyń bas sanıtar dárigeri Erlan Qıasov Naýryz meıramy qarsańynda qazaqstandyqtarǵa málimdeme jasady. 

– Naýryz meıramy kezinde ár adam densaýlyǵyna erekshe mán berýi kerek. Ásirese, "qyzyl" jáne "sary" aımaqtarda turǵan óńirlerde buqaralyq sharalardy barynsha azaıtýǵa keńes beremiz. Óıtkeni bul sharalarǵa halyq kóp jınalyp, aýrýdyń taralý qaýpi artady. Al "jasyl" aımaqtaǵy óńirlerge sharalardy adam sanyn meılinshe shektep uıymdastyrýǵa, negizgi sharalardy onlaın ótkizýge keńes berdik, – dedi Qıasov Ortalyq komýnıkasıalar qyzmetindegi baspasóz máslıhatynda.

Sondaı-aq ol elde koronavırýs ınfeksıasyna qarsy vaksınasıa jalǵasyp jatqanyn atap ótti.

– Búgingi tańda birinshi komponentpen 83 839 adam egildi. 22 aqpannan bastap ekinshi komponentpen egý bastaldy, onymen búginge deıin 19 312 adam egildi, qolaısyz kórinister tirkelgen joq.

Respýblıka boıynsha 58 863 medısına qyzmetkeri, 13 744 pedagog, kúsh qurylymdarynyń 4 094 qyzmetkeri, 1 010 ýchaskelik polısıa qyzmetkeri jáne medısınalyq-áleýmettik mekemelerdiń 393 personaly men kontıngenti quraýyshta vaksınasıalandy, – dep atap ótti bas sanıtar dáriger.