Búgin májilis tóraǵasy Nurlan Nyǵmatýlın Búkilqytaılyq halyq ókilderi jınalysy Turaqty komıtetiniń tóraǵasy Lı Chjanshýmen beınekonferensıa baılanysy arqyly kezdesý ótkizdi, dep jazady májilistiń baspasóz qyzmeti.

Palata spıkeri Qytaı Halyq Respýblıkasy Qazaqstannyń mańyzdy strategıalyq áriptesi, dos jáne tatý kórshisi ekenin atap ótip, eki el arasynda dıplomatıalyq qatynastar ornaǵan 29 jyl ishinde senimdi saıası dıalog, tereń ekonomıkalyq baılanystar ornap, jan-jaqty yntymaqtastyqtyń belsendi damyǵanyna nazar aýdardy.

Kezdesý barysynda Nurlan Nyǵmatýlın osynyń barlyǵy qos memleket kóshbasshylarynyń dostyǵy men senimdi qarym-qatynasynyń arqasynda qol jetkizgen jetistikter ekenine toqtalyp, odan ári Qazaqstannyń tuńǵysh prezıdenti Nursultan Nazarbaevtyń memleketaralyq qatynastardyń strategıalyq áriptestik deńgeıine jetkizý jolyndaǵy mańyzdy rólin atap ótti. Sondaı-aq, májilis tóraǵasy Qazaqstannyń qazirgi prezıdenti Qasym-Jomart Toqaevtyń Qytaımen yntymaqtastyqqa úlken mán beretinin aıtty.

Óz kezeginde, Lı Chjanshý Qazaqstannyń jaqyn da shynaıy dos memleket ekenine nazar aýdaryp, elder arasyndaǵy joǵary dıplomatıalyq jáne yntymaqtastyq baılanysqa kóńil bóldi. Sonymen qatar, Lı Chjanshý ótken jyl elder úshin kúrdeli kezeń bolǵanyn atap ótip, indet ýaqytynda Qytaı men Qazaqstan arasynda koronavırýsqa qarsy ózara qoldaý belsendi júrgizilgenin aıtty.

Búkilqytaılyq halyq ókilderi jınalysy Turaqty komıtetiniń tóraǵasy Qazaqstannyń gúldenýine nıettes bola otyryp, memleket basshylarynyń eldi damytý jolyndaǵy aıryqsha eńbekterine toqtaldy. Sondaı-aq alda qoıǵan mindetter men josparlardyń sátti oryndalyp, Qazaqstannyń tabysty 30 memleket qataryna qosylatyna senim bildirdi.

Kezdesý barysynda májilis tóraǵasy karantın sharalaryna qatysty Qazaqstan-Qytaı shekarasyndaǵy ótkizý beketter arqyly júkterdi tasymaldaýda qıyndyq bolǵanyna baılanysty avtokólik jáne temirjol qatynastarynyń úzdiksiz jumysyn qalpyna keltirý úshin Qytaıdyń ótkizý beketterinde, "ekspress-dálizder", "jasyl dálizder" jáne júk tasymalyn ulǵaıtý úshin "temir kerýen" qurý jónindegi bastamany iske asyrýdy jalǵastyrýǵa Qazaqstan daıyn ekenin jetkizdi.

Nurlan Nyǵmatýlınniń pikirinshe, bul pandemıa jaǵdaıynda Eýrazıa qurlyǵyndaǵy "Qytaı-Eýropa" baǵyty boıynsha temirjol qatynasyn odan ári damytý jolymen óńirlik ekonomıkalyq ıntegrasıa sheńberinde Qazaqstan-Qytaı yntymaqtastyǵyn nyǵaıtýǵa múmkindik beredi.

Sonymen qatar, májilis tóraǵasy kezdesýdiń Qytaı Komýnıstik partıasynyń 100 jyldyǵy qarsańyna sáıkes kelgenin alǵa tartyp, dostas Qytaı eline órkenıet pen baq-bereke tiledi.