Bıyl bilim jáne ǵylym mınıstrligi QazUÝ-ge tıesili jer teliminiń satylýyna baılanysty pikir bildirdi. Bul týraly mınıstr Asqat Aımaǵambetovtyń "Aq jol" fraksıasy depýtattarynyń saýalyna bergen jaýabynda  aıtylǵan.

– Ál-Farabı atyndaǵy Qazaq ulttyq ýnıversıtetiniń jer telimin túzetýge qatysty post jarıalaǵannan keıin, tez arada mınıstrliktiń jumys toby sybaılas jemqorlyqqa qarsy is-qımyl agenttigimen birlesip, baıandalǵan barlyq faktilerdi tekserýdi bastady. Júrgizilgen tekserý qorytyndysy boıynsha QazUÝ jer ýchaskesiniń 0,779 gektarǵa azaıý faktisi rastaldy. Osyǵan baılanysty, jer ýchaskelerin basqarý bóliginde QazUÝ qyzmetin tolyqqandy zertteý maqsatynda mınıstrlik keshendi tekserý júrgizýdi kózdedi. Alaıda aǵymdaǵy jylǵy naýryzda respýblıkalyq búdjettiń atqarylýyn baqylaý jónindegi esep komıteti QazUÝ-ǵa aýdıt bastaýyna baılanysty qoldanystaǵy zańnamaǵa sáıkes tekseris júrgizý múmkin emes, – dedi Aımaǵambetov.

Mınıstr sondaı-aq bıyl 8 joǵary oqý ornyna tıesili aktıvter tekseriletinin aıtty.

"2020 jylǵy jeltoqsannan bastap, joǵary oqý oryndarynyń komersıalyq emes aksıonerlik qoǵamdarǵa qaıta uıymdastyrylýynyń aıasynda mınıstrlik vedimistik baǵynysty joǵary oqý oryndarymen birlesip, olardyń esebin retke keltirý, jer kodeksiniń talaptaryna sáıkes keltirý, joǵary oqý oryndarynyń jyljymaıtyn múlik obektileri týraly málimetterdi memlekettik organdardyń derekterimen birizdendirý maqsatynda jer ýchaskelerin qosa alǵanda, barlyq jyljymaıtyn múlik obektilerin túgendeý boıynsha jumys júrgizip jatyr.

Sonymen qatar bıyl mınıstrlik 8 joǵary oqý ornynyń qyzmetin tekserýdi josparlap otyr. Onyń barysynda olardyń aktıvteriniń jaı-kúıi tekseriletin bolady" dedi ol.

Aımaǵambetovtiń aıtýynsha, mınıstrlik memlekettik múlik jónindegi ýákiletti organda kelisýdegi jyljymaıtyn múlikti, onyń ishinde jer ýchaskelerin ıelikten shyǵarý máselelerin dırektorlar keńesiniń quzyretine jatqyzý bóliginde joǵary oqý oryndary jarǵylaryna ózgerister engizý máselesin pysyqtady. Bul baqylaýdy kúsheıtýge jáne joǵary oqý oryndarynyń aktıvterin qandaı da bir ıelikten shyǵarýdyń aldyn alýǵa múmkindik beredi.

"Joǵary oqý oryndarynyń dırektorlar keńesteri korporatıvtik sheshimder qabyldaý kezinde ashyqtyqty qamtamasyz etý úshin qurylǵanyn atap ótken jón. Dırektorlar keńesiniń quramyna parlament depýtattary, bilim berý salasynyń kórnekti qaıratkerleri jáne táýelsiz sarapshylar engizilgen. Osy maqsatta konkýrstyq rásimder ótkizý arqyly joǵary oqý oryndarynyń rektorlaryn taǵaıyndaýdyń ashyq júıesi engizildi. Jalpy joǵary oqý oryndary qyzmetiniń tıimdiligi men ashyqtyǵyn arttyrý máseleleri mınıstrliktiń turaqty baqylaýynda" delingen mınıstrdiń depýtattarǵa bergen jaýabynda.