Erjan Jylqybaev Taraz qalasynyń ákimi bolyp taǵaıyndaldy, dep habarlady Jambyl oblysy ákiminiń baspasóz qyzmeti.

"Jambyl oblysy ákiminiń ókimimen prezıdent ákimshiliginiń jáne qalalyq máslıhat depýtattarynyń kelisimimen Erjan Jylqybaev Taraz qalasynyń ákimi bolyp taǵaıyndaldy" delingen habarlamada.

Oblys ortalyǵynyń jańa ákimin qala aktıvine aımaq basshysy Berdibek Saparbaev tanystyrdy.

– Aıtqazy Qarabalaevtyń atqarǵan jumysyna rahmet aıtamyn. Taraz oblys ortalyǵy bolǵannan keıin onyń damýy aımaqtyń damýyna tikeleı baılanysty.

Erjan Jylqybaev biraz jerde qyzmet atqardy, synnan ótti. Tarazdyń damýyna bar tájirıbesin salady dep senemin. Eń bastysy, birigip jumys isteý kerek. Taraz mádenı, týrızm ordasy bolýy kerek. Byltyrǵy jyl Qordaıǵa kóp kóńil bólinse, bıyl Tarazǵa erekshe nazar aýdarylmaq. Halyqtyń jaǵdaıyn jaqsartý, áleýmettik nysandar salý, ınfraqurylymdy,  kelbetin jaqsartýǵa kóńil bólinedi, – dep atap ótti Berdibek Saparbaev.

Aıtqazy Qarabalaev Taraz jurtyna alǵys bildirdi. Al jańadan taǵaıyndalǵan ákim Erjan Jylqybaev artylǵan senimdi aqtaımyn dep sendirdi.

Erjan Jylqybaev 1982 jyly týǵan, bilimi joǵary.

M. Áýezov atyndaǵy Ońtústik Qazaqstan memlekettik ýnıversıtetin "Ekonomıs-menedjer", QR Prezıdenti janyndaǵy memlekettik basqarý akademıasyn "Memlekettik jáne jergilikti basqarý magıstri", S. Amanjolov atyndaǵy Shyǵys Qazaqstan memlekettik ýnıversıtetin "Zańger" mamandyǵy boıynsha bitirgen.

Eńbek jolyn 2003 jyly Ońtústik Qazaqstan oblystyq ekonomıka departamentiniń bas mamany qyzmetinen bastady.

2006-2009 jyldary parlamenttegi úkimet ókildiginiń bas sarapshysy, ekonomıka jáne búdjettik josparlaý mınıstrliginiń bólim basshysy, eńbek jáne halyqty áleýmettik qorǵaý mınıstriniń kómekshisi qyzmetterin atqardy.

2009-2014 jyldary – SHQO ákiminiń apparaty basshysynyń orynbasary, Semeı qalasy ákiminiń orynbasary, Shyǵys Qazaqstan oblysy ákimi apparatynyń basshysy.

Ár jyldary prezıdent ákimshiliginiń memlekettik baqylaý jáne uıymdastyrý-aýmaqtyq jumystary bóliminiń memlekettik ınspektory, Almaty qalasy Medeý aýdanynyń ákimi qyzmetinde bolǵan, eńbek jáne halyqty áleýmettik qorǵaý mınıstriniń birinshi orynbasary qyzmetin atqardy.

2020 jyldyń aqpanynan bastap Jambyl oblysy ákiminiń orynbasary bolǵan. "Qurmet" ordenimen, túrli memlekettik jáne halyqaralyq nagradalarmen marapattalǵan. Úılengen, 4 balasy bar.