Otandyq boks ardageri Borıs Semenovıch Shvırashvılı qaıtys boldy. Bul týraly Qazaqstan boks federasıasynyń baspasóz qyzmeti habarlady.

– Borıs Semenovıch 85 jasta edi. Ol aýrýynan tolyq aıyǵa almady jáne otbasyndaǵy tragedıa, ıaǵnı ulynyń ólimi soqqy boldy. Ardagerdiń júregi 19 naýryzda toqtady, – dedi federasıa ókilderi.

Boks ardageri eldegi kóptegen týrnırlerdi uıymdastyrǵan.

"Borıs Semenovıch Shvırashvılı – KSRO-nyń jáne Qazaq KSR-niń eńbek sińirgen bapkeri, bokstan Ázirbaıjan KSR-niń birneshe dúrkin chempıony, olımpıada oıyndaryna qatysqan halyqaralyq dárejedegi tóreshi. Ol bedeldi kisi boldy, sondaı-aq sportta tájirıbesi zor boldy. Qazaqstan boks federasıasy atqarýshy komıtetiniń múshesi retinde ol eldegi kóptegen týrnırlerdi bar kúsh-jigerin salyp uıymdastyrdy" delingen federasıa habarlamasynda.

Qazaqstan boks federasıasynyń basshylyǵy men ujymy Borıs Shvırashvılıdiń týystary men jaqyndaryna, dostary men áriptesterine kóńil aıtady.